Ciaravalle Zeneize/Ciaravalle 1835/O sciato de Banchi
| ←torna a-a lista di atri scriti | Ciaravalle Zeneize 1835 de O Sciato de Banchi |
| (stampaja Pellas - 1835) |
Sciato de Banchi.
Che sûssûro che l’è mai
Sempre a Banchi, figgi cai!
Mi no sò comme se fassan
In ti Scagni a travaggiâ,
In veitæ, se me pagassan
No gh’andieìvo manco a stâ!
Oh che Ciassa! a pâ un-na Fëa,
Un Bordisco, un-na Galëa!
Pe-o continuo ramaddan,
E o gran sciato, che ghe fan;
Ve ne daggo chì l’idëà,
(Se a ëse inteiso aviö o bonheur).
Inprinçipia o Decrouteur
A criâ forte « Sciô sciâ vêu
Che ghe-i spasse ?.. e stæ segûi
Ch’o ve-i brûxa cö vetriêu!
Primmo guagno! e primmi lûi!
Da lì a un pö veddeì sbuccâ,
Comme balle de canon,
Çento Diavi per sbraggiâ
A l'è chì!.. a l'è chì a Canson...
Gran Sciortiä che fà e Fuxin-ne!
O Gielôa, co-e Pellegrin-ne!
A l'a chì! ... un-na palanchetta,
Chi s'accatta a Cansonetta?...
Ne se pêu ciù stâ in sciâ Ciassa
Tutto o giorno pe-a Cazassa,
(Tanto ciù, se gh’è o vinetto!)
Oh che sciato maledetto!
Che caladda, figgi cäi!
Spunta un'atro chi hà pe-a man
Un-na risma de Lunäi,
Ciaravalli de Milan,
Che o ve vêu de filo vende!...
Gh’è quell’atro chi destende
Tappessaie, quaddri, spegi,
Strapuntê, scävazzi vegi!
E ve-i fà pagâ per bôin
Con fâ Caæga ogni pittin!
L’atro o sbraggia « Tondin e Gotti!
A bon prexo!... Buttiggæia!
E ve pösa lì un’armæia
De scartammi, e d’oinæ rotti!
Passa un’atro chi fà i lotti
E de pesci, e de pullæia,[1]
E ghe fà restâ i merlotti!
Sêunna un Orbo l’organetto
Descordôu chi mette raggia!
Un Strusciôu mostra o quadretto,
E ve fà accattâ a medaggia!
Gh'è quell'atro, co-i speggietti,
Chi v'allöa co-i campanin,
Poi ve dà i Numeri bôin
Da zugâ in çento biggetti!
L'atro o l’impatära a Ciassa
C’un-na pæsta de fûgassa
Neigra, pin-na de brenetto
A un çenteximo o tocchetto!
Sentî un atro forte criâ
C'un-na tibba da fornâ »
Questi chì che son mandilli!
Con due mutte ve-i regallo!....
Un Foestê se mette in ballo
Co-a Bûttega de Scigilli!
E là gh'è i Guastamestê
Astreggando a Ciassa ben
De razoî, tezuje, tempen
Per taggiâ a chi passa i pê!
Gh'è o Villan chi vende e meje,
Gh’è a Paisan-na chi g’hà e peje,
E o Figgiêu chi porta i grilli!...
Lazzù gh'è de righinaggie
(Griffi proprio da Mastrilli!)
Con gaggiêu, gaggiôin, e gaggie,
Che bezêugna cavalcâ
Con rompîse e gambe, e o collo,
Dunque no se pêu passâ!
Capita un chi fà da sciollo
Pè applicâve a beccassin-na
Tanto fresca, che a camin-na!
Là gh'è l'Oxellôu co-a Scioëa
Che ve tappan a scainâ;
Manco in Giexa poeì ciù intrâ!
Passa a busciora, a lettëa,
Passa i axi, i mû, i cavalli,
I bibbin!.... passa i camalli,
Che ve dan primma un spuncion,
Poi ve dixan « Sciâ s'avvarde!...
E ve mâtrattian ancon!
Passa quelli (Dio ne guarde)
Dilettanti spaximæ
De mandilli nêuvi, e uzæ...
(Avvardæve!.. che ve o fûmman!)
Lì ghe stà i Chichirichî,
E i..... no sò se me capî.....
(Zitti! zitti! che v’allûmman!)
Lì se ferma o Zembettin,
E a Stortetta, chi fà a bella,
Co-a chitâra, e cö violin
Per cantâ o Torototella!
Lì a tutt’ôe, quanti ne ven ,
Mette banco i Ciarlatten!
Cavadenti! Vendiçeotti!
E i Zugoeì de bûsciolotti!...
Che se piggian tutta a Ciassa,
Barbasciûscia!... no se passa!....
Lì se ferma i Saltaduî,
Co-e Baccanti dizzossæ,
Per fâ muî dall’anscietæ!....
Ursi, Scimie , Chen, (orroî!)
Calamitta de bacchæ!
Che dä spûssa ve fan muî,
E insordî da-o ramaddan,
Che per muxica, e per banda
A cattûbba sola g’han!....
Ve vortæ da un’atra banda?
Ghe veddeì mille fûghetti
D’ommi, donne, e garsonetti
Che van là dosso, e bordosso!....
Gh’è un chì g’hà tutti i segretti
Per fâ muî i animaletti!
(Meno quelli ch’o l’hà adosso)
Gh’è ciù in là un atro chi spaccia
Un intingolo de Triacca
Per levâ qualunque maccia!
(Meno quelle ch’o l’hà in stacca)
Quello o sbraggia « per accendere
Presto i Lumi senza battere!....
L’atro « Lucido bellissimo
Per le scarpe a prezzo modico!
(Aa congreve! economiscimo!)
L’atro o cria « Marchand ruinê!
(Ghe n'è di atri comme lê...)
Mostra un nêuvo Don Chisciotte
(Chi è ciù riondo che un-na botte)
A so gran Lanterna magica
Contorniâ da mille bindoli,
Che stan lì a duî visi! etcettera.
Che invexendo! e che sûssûro!
No se pêu sta ciù in sciâ Ciassa!...
Quella a gh’à o formaggio, e o bûro,
E quell’atra a g’hà l’armoassa!
L’atra a dixe, ch’a g’hà e ciocche,
E quell’atra i articiocche!....
Passa quella co-a viovetta
Che pe-o nazo a ve vêu dâ!
Quello o l’hà a scimia in spalletta
Se ve voeisci[sic] fâ addentâ!....
L’atro o mostra o pappagaggio
Senza poeilo fâ parlâ!
E quell’atro faccia tosta!
O no ven da Massa apposta,
Per criâ » ch'o l'ha grosso, l'aggio
Co-e zivulle da sarvâ?
Che ghe dæsci un-na mascâ!
Quello o vende o can da caccia,
Quello o g’hà a bella scciuppetta,
E quell’atro un-na boccaccia!...
Passa quello co-a fiaschetta,
Passo l’atro co-a serretta,
E quell'atra co-a berretta,
E quell’atro co-a giacchetta!....
Gh’è n’è sempre da passâ?
Se n’hò manco prinçipiôu?
Ghe n’è ancon da mogognâ!
Passa quella con l’axôu,
Passa quello co-e zunchæ;
Che son meze deslenguæ!
Passa quella cö merello,
E quell’atra cö frenguello;
Passa quella cö puiscetto,
Passa quella cö galletto,
Che a ve vende per cappon!
A Fuxan-na cö pescetto
Per dâ ao gatto manco bon!
Sempre sciato, e confuxion!
Passa un atro Battaggion?..
Quello o g’hà e bertelle elettriche!
E i cappelli incombustibili!
O Gaitan, bacchette magiche!
E pistolle inespugnabili!
Passa o Munferrin co-i triffoli,
A Lorbasca con di sparaghi,
A Ciavaæn-na co-e damaschine,
A Margaita co-i briccocali,
E a Biriciccî co-e zizzore!...
Tutti vendan mirabilia!
No se stà quëti un momento,
Gh’è un continuo muìn da vento!
Chi g'hà i erbôi de limôin,
Chi g'hà a vigna, chì i çetrôin,
Funzi secchi belli belli!
Marunsini, canestrelli,
Confittûe per fâ duî a pansa!....
Di Sciûrbetti finna gh'eì,
Freìdi, o Cadi, comme voeì,
Bûtteghin in ambulansa!...
O Caffè pè un södo dan,
E de Mogano ghe l’han!...
Virâ sempre l'Abbondansa!
Oh che bosco de baccan!
Da per tutto s'è buttæ,
Circondæ, bariccaddæ,
Nè seì ciù dove passâ!...
Se se leva un po de vento?
Figgi cai! no ve diggo atro!...
Tutti i cartellôin do Teatro
(Con di gren spegassi drento!)
Cose fan lô ascì de sciato!
Ven i vermi da-o resato!
Pâ che vadde a Lögia all'aja,
Sempre ciù a testa s'innaja!...
Cose gh'è lazzù?... per bacco!
Scappa a Gente! se vêuan dâ?...
O l'è o Cärro do tabacco
Chi no pêu piggiâ a montâ!
Scûggia o mû, o sciacca un figgiêu!
Che l’è quello che ghe vêu;
(E poi dixan che se dan).
Figgi cai, che ramaddan!
Che invexendo, e tremmelêujo
Che gh’è a Banchi tutto l'anno!...
Me scordavo i vendipanno,
E quelli atri do relêujo?...
I gren chen che se scurriscian
Che fan cazze, e ve scomp.....
Tutti i povei, che v’asseddian,
I mainæ d’ogni nazion,
Tante lingue che ve teddian;
I Faineants de profescion,
O passaggio de Grivëe;
I famosi novellisti
De notizie non mai vëe;
I continui zigaristi
Che v’ammorban da-o fetô,
E son pezo che o vapô!
Stan a Banchi per costûmme,
A ægua, vento, neive, e sô
Pe exitâ balle de furmne!
Sempre sciato, e sempre fô!
No sentî che sbraggi, e lûi!....
No ve fruscia ciù e grondan-ne,
Ma ghe poeì mette e campan-ne!
E azzunzeìghe ascì i tambûi,
Finna i morti quando passan!
Onde torno a replicâ
Che no sò comme se fassan
In ti Scagni a poeìghe stâ;
Sotto a Lôgia.... se fà o resto!!!
Che taxiö per fâ ciù presto,
Che no vêuggio scantinâ.
Con due righe d'Ordinanza,
E un pittin de Vigilanza,
Se pêu a tutto rimediâ.
- ↑ "bottiggiaia - armaia - pollaia" inta verscion do 1864