Ciaravalle 1833/Rimma trovâ
| ←Sciaradde | Ciaravalle zeneize pe l'anno 1833 de Rimma trovâ |
Inconvenienza pe-a Sumegianza→ |
Rimma Trovâ
Un-na nescia de Scignôa,
Chi façeiva da Dottôa,
Mentre a l'ëa in conversazion
Ao so solito a dettâ,
Voendo mette in suggezion
E fâ un Poeta mincionnâ,
A ghe disse, che o dixesse
Un vocabolo chi fesse
Co-a so Scuffia rimma bon-na;
L'é imposcibile, Padron-na,
(O rispose, ammiandoa ben);
E perchè? Vate mincion!...
Perchè quello chi apparten
A un-na testa comme a sò
N’hà ni rimma, ni raxon!
Bella rimma che o trovò.