Chittarin zeneize 1881/499 Ringraçiamento

by Martin Piaggio

←Sunetto

Chittarin zeneize de Martin Piaggio Ringraçiamento

Sunetto→

reçitâ da-a Gioxepiña N., figiœua de trei anni, balæña into tiatrin de Vigne

RINGRAZIAMENTO ¹

Scignorinn-e, se presenta
Quella pövea Giöxepinn-a,
Che, sebben coscì piccinn-a,
De treî anni, a ve contenta
Tûtte e seje sensa fallo
E nell’opera e ne-o ballo.

Sento bàttime de moen
E ciammâme sempre fêua,
Sento dî: Bella figgiêua!
Cösa caa!... Comme a fa ben!...
E cioccate son ben bonn-e,
Ma per mi l'é mëgio e bonn-e.

Ma sciccomme staeiva mâ
O cacciâme da-i palchetti
Cöse dôçe, fenoggetti,
E ätri cinci do speziâ,
Coscì son vegnûa a piggiâme
Quello che vorriesci dâme.

Son piccinn-a e me contento
De piggiâ cöse se sæ,
E magara di dinæ!....
Che ûn trasporto zà me sento
Per o lûcido metallo
Chi fa affiâ ciù e gambe a-o ballo.

Sento ûn ciocco!.... Oh brava gente!
Arvï a borsa!.... Ho zà capio....
Mille grazie! Scialla! addio,
Ve son serva riverente,
E me diggo Giöxeppinn-a
Primma donna e ballerinn-a.