Chittarin zeneize 1881/491 Congedo

by Martin Piaggio

←Sunetto

Chittarin zeneize de Martin Piaggio Congedo

Sunetto→

reçitao da l'aotô do 23 arvî 1826 a nomme di confræ da congregaçion da Santa Croxe quande o so diretô, præ Togno Gianello, o lasciava a confratèrnia pi anâ arçipræve a Ciâvai

CONGEDO ¹

Terminôu, o ben o mâ,
Questo assæ parco disnâ,
I boin fræ de Santa Croxe,
Onoræ da-o Direttô,
Tûtti ûnindo a sò ä mæ voxe,
Desgûstæ, ma pin d’amô,
Se vorrieiva congedâ
Da chi no se pêuan staccâ.

Oh incombensa dolorosa
E per mi troppo spinosa!
Fataliscimo momento!......

Ah! perché n’ho i voli franchi
Do Cavalli e do De Franchi?
Questo o saeiva ûn argomento
Da fâ tûtti cianze i fræ
Pe-o grand’ommo che perdemmo,
Che per prêuva conoscemmo
Pin de zelo e de caitæ,
Apostolico, evangelico,
Aureo de costûmmi e angelico,
Indefesso confessô,
Instancabile oratô,
Che da sò eloquente voxe
Risûnniä per sempre a Croxe ²
E a restiä scolpïa ne-o chêu
Di confræ comme de sêu.

Sorte nostra disgraziâ!
E ti Ciàvai fortûnâ!
Che invidiosa ti ne piggi
Ûn gran meistro pe-i tò figgi.
Va sûperba do tò acquisto,
Che ti n’hæ troppa raxon,
Lascia o nostro ötöio tristo,
Desolâ a congregazion,
I zeneixi incontentabili,
I sò amixi inconsolabili,
Perché perdan in Gianello

De virtù tûtte o modello,
L’esemplare, l’ommo onesto,
L’erûdïo quanto modesto,
O perfetto sacerdote.

Cianzeì, anime divote,
Che con voî noî ascì cianzemmo,
Ma de chêu o Segnô preghemmo
Chi conserve lungamente
A preziosa sò existensa,
E ch’o trêuve in nêuva gente
Quell'amô, stimma e obbediensa
Che noi gh’emmo sempre avûo,
E che presto conosciûo
Sacce Ciàvai, nostra erede,
L’Arçipræve che a possede.

E voi, nostro Direttô,
Aççettæ, ve ne preghemmo,
Questi voti dell’amô
Che pe-i ûltimi ve femmo,
De noî mai no ve scordæ,
Saemo sempre i vostri fræ.