Chittarin zeneize 1881/465 Sunetto

by Martin Piaggio

←Sunetto

Chittarin zeneize de Martin Piaggio Sunetto - a-o Scimon Mayr

Cançon→

za pubricao do 1813 co-o tittolo "All'inarivabile meistro Scimon Mayr" (clicca pe 'n rafronto)

SÛNETTO ¹

Portento de natûa do dì d'anchêu,
Meistro de tûtti i meistri rinomæ,
Genio di genj, armonica deitæ
Disceisa in tæra per beâne o chêu;

Chi ælo quello ommo che inventâ mai pêu
Motivi coscì belli e delichæ,
Pessi, de paradiso imbalsamæ,
Conçerti de canäi e roscignêu?

Chi t’ha posciûo inspirâ quello tersetto
Chi ne rapisce, e chi te dé l'incanto
De scrive quello magico düetto?

Dove ti hæ impreiso mai l'arte do canto?
Dimme chi ti ê?.. Ti ê ûn Dio? Scì, ghe scommetto,
Ché l’ommo in tæra non arriva a tanto.