Chittarin zeneize 1881/437 Sunetto

by Martin Piaggio

←Martelien

Chittarin zeneize de Martin Piaggio Sunetto

Sunetto→

pe-e noççe da Roxiña Roiœua co' l'Aostin Scaçço.

SÛNETTO ¹

Rêusa, ciù bella sciô da primmaveja
Ornamento ciù bello d’ûn giardin,
Feliçe chi t’acchêugge de mattin,
Avanti che te guaste o fâ da seja!

Rosâ do Çê, che a-e scioî ti levi a peja
Co-e tò fresche goççette de rûbin,
Balsamo salûtare mattûtin
Capaçe a risanâ qualunque feja!

Sposoeì, coscì seì voî, rêusa e rosâ,
Rosinn-a e Agostinetto apposta creæ
L’ûn per l’ätro pe amâse e fâse amâ.

Virtù, bellessa, titoli, dinæ,
Ah! che no poeiva Amô tesce e formâ
Gruppo ciù bello e ciù feliçitæ.