Chittarin zeneize 1881/429 Sunetto

by Martin Piaggio

←Sunetto

Chittarin zeneize de Martin Piaggio Sunetto - a-o Manoælo G.

Sunetto→

SÛNETTO ¹

M'han fæto l'ätro giorno fâ ûn sûnetto
Pe ûn çerto matrimonio chi è seguïo
D’ûn sciô, che con due donne ha zà dormïo
E chi ha vosciûo dormî co-a tersa in letto.

Mi che me piaxe sempre o parlâ sccetto,
Che d’ësime majôu son zà pentïo,
Ho dito, e sempre diö (sarvando Dio)
Majâse torna é balla e ghe scommetto.

M’é parso, se no sbaglio, che o sposôu
Scibben ch’o me fa o bello ciù ch’o pêu,
Se segge do mæ dito ûn pö piccôu...

Se o no me dà de nosse ùn pappajeu,
E che o continue a fâme o scorrussôu,
Taxo... ma o me sentiä a-o primmo figgiêu.