Chittarin zeneize 1881/289 Sunetto

by Martin Piaggio

←Brindixi

Chittarin zeneize de Martin Piaggio Sunetto - Boñe feste da-i camê do Cafè di Americhen

Strofoggio→

SÛNETTO ¹

Scià se degne gradî, sciô patronetto,
Questi quattorze versci portoglien,²
Che ghe presenta a moddo de massetto
I camê do Caffè di Americhen;

Façile a indovinâse n’é l’oggetto...
Per dâghe e Sante Feste bonn-e ben,
Che ghe e concede allegre o Bambinetto
C’ûn Bon Prinçipio e Fin d’anno che ven.

Son questi i voti che de chêu ghe femmo
Pregandolo a vegnî in gran compagnia
Seja e mattin, ché noi ghe promettemmo

De dâghe da tûtt’ôe roba milïa,³
Per capära a bûscioetta ⁴ ghe mostremmo,
E a ricompensa a sä a sò cortexia.