Chittarin zeneize 1881/115

by Martin Piaggio

←Sfœugo poetico

Chittarin zeneize de Martin Piaggio Sghiribiçço - Descriçion do zœugo do "goffo"

Supprica→

SGHIRIBISSO ¹

L'ätra nêutte n’ho posciûo
Strenze ûn êuggio, e m’è vegnûo
In chêu o nostro goffettin
E o prûrito da poexïa;

E fantasticando a-o scûo
Me grattavo... o chittarin,
Invocando a favorïa
Mûsa mæ, ma a l’ëa addormïa,
O che dunque a mascarsonn-a
A zûgava in Eliconn-a

Con Apollo (lê ascì a-o scûo)
A cäbraghe² de segûo:

Cosciché, pöveo Martin!
Sensa guidda, insemme ho misso
Questo poetico pastisso
In sciö nostro tavolin
Do goffetto, pöchettin,
Per no perdine a memöia,
Perchè o reste ne l'istöia
Di gren fasti da speziaja,
Per veitæ e non bûzaraja,
A önô e gloria di zûgoeì
Do pûpillo e di mangioeì.

E, se avieì tanta paziensa
De sentîlo, ve o lezziö
E o pappê poi ve lasciö,
Da servîve all'occorrensa.

Favorîme d’attenzion,
Bagno o becco dolcemente,
Poi ne fasso brevemente
Ciù che posso a descrizion.

Dunque, comme ve dixeivo,
E böxie dî no vorrieivo,
Pe passâ quelle tediose
Lunghe sejann-e invernose
Nè contâe tanto granïe ³
Da fâ cazze zù e sganzïe,
S’è introdûto o zûghettin
D’ûn goffetto ben piccin,
Da no perde guæi dinæ
E stâ lì tûtti ascädæ.

Onestiscima demôa,
Per passâse in societæ;
Ché andâ in letto de bonn’ôa
A l'é cosa da sposoeì,
O da chi recciûmma o peì;⁴
Poi, con ciù presto gh’andæ,
Sempre ciù i lensêu frûstæ.

Gran feliçe e bella idëa
De bandî quella scacchëa⁵
Chi frusciava orrendamente
E ciammâ in cangio: Peccetto,⁶
(Che de vòtte o no ve sente)
Aççendeì! presto o mucchetto,
Dæ recatto a-o tavolin,
Lûmme, carte e panêtin...

Dito e fæto, in t'ûn momento
O l'aççende o sò bricchetto
C'ûn pittin de soffranin.
Sbucca presto ûn reggimento
De zûgoeì grendi e piccin,
Scappæ tûtti da-a braxea...⁷
Se desfà a faarmacopea,
Banche all’äia, banchettoin,
Scambelletti e scambelloin!...
A sentî che ramaddan,
Che invexendo che se sente,
Pä che vegne ûn uragan!...
Manca o scïto a tanta gente;
Beati quelli che ghe l’han!...

Varda ä bomba!... s’ïsa in pê,
Per piccâ da testa in çê,
Falco e Figoli... ⁸ poi ven,
Comme sciammi de nottoen,
Per pittâ mutte... Rivan ⁹
Casabonn-a, Maraggian,
Grosso, Grasso, o sciô Guernê,
Piaggio... e spunta tardettin
O Lûcasso co-i pappê
Divorando meî-pippin,
Aggiûttôu da Mongiardin.

Piggian posto ammacchettæ,¹⁰
Comme tanti pesci-sæ,
Ché in duî parmi de pertûso
De zûgâ s’é misso l’ûso;
Non con ûn, ma duî poistæ,¹¹
E de votte per abûso,
Finn-a treì, ma interessæ:
Invenzion do sciô Reginn-a
Perchè segge a lûnn-a pinn-a,¹²
Ma strenzemmo l’argomento.

L’é i campioin tûtti a-o çimento
Barricchæ da tanti astanti,
Applaudenti e scindicanti,
Che no seì ciù dove spûâ,
Se no spûæ addosso a-o colerico
Baraccan ûsôu utinico ¹³
Chi no se pêu ciù ammaccià,
Perchè zà tûtto ammacciôu.

Piggia e carte coraggioso
O ciù lesto e valoroso
Di zûgoeì primmo assettôu.
O se-e mette a fottignâ ¹⁴
Per mezz’ôa, poi çeimonioso

Ve ne porze in man ûn pâ,
Che ve e veddan d'arescoso.

Sentî sûbito sbraggiâ:
Passo...¹⁵ Secco... Invito... (ûn cria)
Zêugo... (ûn ätro ghe revia
Meza mutta)... Tëgno... Andemmo...
Ûnn-a mutta... Ebben provemmo...
Ancon questa, non ho puia
(Sbraggia ûn terso con fä o scemmo)
A pûlirsi... Scappa via...
(Ma risponde o quarto) Asbrïa!...
Son chi mi, scià fasse carte.
— Quante? due?... - Unn-a!... - Scià scarte... —
Chi a vêu neigra, chi a vêu rossa.
Quello a vêu ch’a mostre e scciappe.
— Ghe l'ho missa!... — E mi ascì grossa!...
— Son a goffo!... — A l'é dinæ?
— No, a l’é scioî... — Dunque accûsæ.
— Vintitreì... L'abate Luigi!
— Eî raxon! m’arrûxentæ.¹⁶
Comme fûssan tanti luigi
De palanche o fà cioccâ
Ne-o panëto chi é ûn mortâ.¹⁷

Quello pä ch’o no gh’ammïe,
Ma o ghe squaddra ben e dïe

Con fâ o moscio, pe osservâ
Se ciù ninte gh’é restôu!
E o pûpillo ven scordôu,
Ché se no gh’é Martin-bæ,
I pûpilli son strinæ...¹⁸

Ah! o l’è ûn gran divertimento
De passâ qualche momento
In geniale compagnia
E osservâ per tanti versi
(Con lasciâghe qualche lïa)
Quanto i ommi son diversi!

Quello o vêu che l'äze o sbutte
Quando o perde ûn pâ de mutte;
Gh’é quell'ätro chi mosconn-a
Quando o ghe l'ha missa bonn-a.

Questo o se frettella e moen,
Quello bägia, questo sbraggia,
L’ätro giascia: perdiesen!
Quello o rïe, l’ätro o s’arraggia,
Maledindo o goffo e a goffa,
E ghe scappa intanto a l....

S’arve e scattoe, addio tabacco!
Ghe ven dæto presto o sacco;
No se sente che stranûi
E risetti trattegnûi...

Chi se e tïa, chi se e fa tiâ,¹⁹
Chi no vêu mai ciù zûgâ;
Ma o l’é o primmo a l’indoman
Che o veddeì co-e carte in man.

A risponde quello é tardo
Per poeì fâ o passo lombardo:²⁰
L’ätro a posta o v’ha rostïo
E ghe pä d'ëse inricchïo.

Gh’è quell’ätro, gran casann-a,
Chi domanda fâ partïo
Solo quando o l’è in campann-a.²¹
L’ätro o vêu mette in to sacco
Co-o sò eterno barbacïo
E co-e preise de tabacco.

Finalmente gh’è quell’ätro
Che se o perde a sò muttinn-a

O vêu andâ a abbonâse a-o teatro,
Sive a tiâ qualch’ätra oeginn-a,
Cavalcando i carroggetti
Per tornâ poi co-i speggetti.

A l’é proprio ûnn-a demoetta!
Lì se rïe, se barçelletta
Fra l’ascado di regorgiti,²²
E a lûbricitæ di aneddoti.

Lì ghe capita a mascciotta
Co-a bottiggia qualche votta
Che Guernê ²³ in mezo ä caladda
Ghe a vorrieiva impî de badda...

Lì se sente a cronachetta
Scandalosa da giornâ;
Lì se sente predicâ
Tûtte e balle da Gazzetta ²⁴
Che son sempre commentæ
Con de balle pëzo assae,
Allunghïe da ûn sûpplemento
Necrologico lamento.

E per ûltima risorsa,
Pe sciùgâve ancon ciù a borsa
E o çervello lambiccâ

Gh’è a sciaradda da spiegâ,
Dove spicca o gran portento
Pastorinico ²⁵ talento
Chi no n’indovinn-a mai!

Lì se sente tûtti i guai...
Lì gh’è e prûxe da çercâ,
I cappotti da taggiâ
E i romansi da inventâ.

Meschin quello che sovven!
De nisciûn se dixe ben,
Ma a nisciûn se fa do mâ,
Aze, pöveo, dotto, ricco,
Son passæ tûtti a-o lambicco
Ché l’è quello che ghe vêu
Pe descollerâse o chêu
Con trovä tema da rïe
Finn-a in te Necrologie.

Cose gh’ælo, tanto fûmme?
Se fa scûo, s’ammorta o lûmme!
Scignor scì!... pe-a gran raxon
Che non gh’é ciù d’êujo drento;
O Peccetto, economon,
Se n’ha fæto o condimento.

Bonn-a nêûtte; scignoria!
Ché a demoetta a l'è finïa;
O pûpillo é consûmmôu
E o pastisso è terminôu.