Bolle de savon de Carlo Malinverni
Zêuggia grassa
[p. 121 modifica]
Zêuggia grassa

a Felice Oddone

Cäo Felice! - dä maexima carassa
te canto ûnn'atra lûvega canson;
e scibben che anchêu segge zêuggia grassa,
sento che a ste lûçie no gh'ò ciù bon;
spontaneamente tïo a mae barca in taera
pe no sentîme arrigoelâ ûnn-a gnaera.

Spontaneamente, scì, ma cö chêu streito
e co-e lagrime a-i êuggi e ûn groppo ä göa:
che brûtto rûbatton, Segnô beneito!
comme tûtto a sto mondo và in malöa!
ah, pe poeî piggiâ torna ûn pö d'aväo,
comme Fausto dajae l'anima a-o diäo!

Te me veddo passâ d'ärente, a tïo,
çerte passoete, çerte parissêue
cö bûsto.... Ma no gh'é ciù quell'asbrïo...
e o l'é questo o ghignon, questo chi dêue!
Te veddo di figgioîn che ödoan de manna....
Messe dïte ! - n'ho ciù a çigaa in sciä canna. -

[p. 122 modifica]

No poeì dall'aerbo o frûto destaccâ,
no aveì de denti pe sciaccâ a niççêua,
aveì lammo e çimello e no pescâ,
andâ a caccia e tornâ co-a sacca vêua,
en tûtte cöse, cäo Feliçe, o zûo
che dan piaxei comme a sûssâ ûn agûo.

Coscì quello c'ha faeto o gïo do mondo,
c'o l'é staeto patron d'ûnn-a tartann-a,
o torniae, vëgio, a rischio d'andâ a fondo,
pe-o mâ sorva ûnn-a scorsa de bazann-a;
e s'o vedde ûn sciabecco o solo ûn gosso
sospiando o dixe: ah! poëse tornâ mosso.

Trovâme in mêzo a tanta zoventù
che pä ch'a digghe: - vitta! son chì mì....
de votte gh'é che no ne posso ciù:
m'assimenta o sò fâ, o sò presûmì;[sic]
m'angoscia ëse tegnûo comme ûn imbrûmme,
comme ûn oxello chi n'ha ciù de ciûmme.

Ciù neigro d'ûnn-a nûvia abburrascâ,
ciù lûvego d'ûn caroggin do mêu,
scorossôu comme chi se l'ha pe-a mâ
ch'o tacchiae lite scinn-a co-i rissêu,
scappo via mugognandome in ti denti
çerte paole che paan tanti aççidenti.

[p. 123 modifica]

Solo tra e quattro mûage do mae nïo,
me sento a posto e me s'allarga o chêu:
de me[sic] nevo me gödo o barbacïo,
me gödo o vanni e vegni de mae sêu;
lezo o Cavalli, o Tocca, o sciô Reginn-a,
e quando ho sae, vaddo a finî in cantinn-a.

Coscì l'amô da casa e da famiggia,
e a pascion da chitära portoliann-a,
con l'aggiûtto do gotto e da bottiggia
spassan e nûvie comme a tramontann-a:
adaxo adaxo o malûmô o me passa;
se fà sën... spunta o sô... torna a bonassa. -