Bolle de savon/San Silvestro
| ←Ûn figgiêu o l'é comme ûnn-a sciô | Bolle de savon de San Silvestro |
endexo→ |
San Silvestro! - In pê ghe semmo
ancon pronti a fâ cammin:
dunque: scialla! fin che gh'emmo
in sciä rocca ûn pö de lin,
fin che a Parca a torse o fûzo
pe fiâ o fî da nostra vitta,
fin che a morte a no ne pitta,
e a no ne manda a Staggen.
Ahimemi! n'en tûtte rêuze
che s'acchêugge pe-o sentê:
çerti bricchi, çerte crêuze
fan piggiâ di schincapê:
in ta vitta gh'é o refûso
comme in te prêuve de stampa....
ma scì! l'ommo fin ch'o scampa
sempre o spera ûn pö de ben.
A speransa a l'è a ciaebella
chi se vedde in mëzo a-o gran
e che a-i piscari a pä bella:
quande ä tegnan streita in man,
perchè - dixan - fä bombaea
se l'é ninte o tò lûmmetto?
se, ciaebella, ti ë ûn vermetto
neigro e ti metti ghignon? -
A-o finî dell'anno vëgio,
e cö primmo de zenâ,
dixe l'ommo: - a l'andiâ mëgio!
ch'agge sempre da gûmmâ? -
Con fî d'öu, d'argento e saea
e ciù belle cöse o tesce...
ma o s'accorze poi ch'en vesce,
e ch'en... bolle de savon!