Bolle de savon/Pasqua
| ←O Parmê | Bolle de savon de Pasqua |
Mascherinn-a, te conoscio!→ |
Cantemmo Pasqua, a vitta, a zoventù, l'amô,
a taera ch'a se teccia sotto a-o baxo do sô,
i brotti di erboi, i pampani da vigna, l'erba noëla....
torna ûnn-a prinçipessa chi paeiva ûnn-a çeniela.
L'é ûnn-a bellessa o prôu, l'é ûn incanto o giardin
co-a viovetta, co-a rêuza, cö baico e o giäsemin;
o costiggiêu o l'é verde, son verde a villa e l'orto....
Alleluja! alleluja! – resuscita chi ëa morto.
Gh'é dappertûtto ûnn'aja de festa; a-o monte, a-o cian
scioîscian e ciante, cresce a vista d'êuggio o gran;
canta da mëzo a-e rocche l'aegua viva do riâ,
e, carmo sensa maoxi, se diae de laete o mâ:
scinn-a in te mûage vëge, scinn-a tra quattro prïe
gh'é quarcosa de bello, gh'é quarcosa chi rïe:
ogni casa a l'ha ûn vaso de fiori in sciö barcon,
ogni poeta, pe grammo ch'o segge, ûnn-a canson,
ogni chêu ûnn-a speransa, ogni erbo o l'ha o sò nïo,
e figge... e figge aspëtan chi ghe tïe o barbacïo.
Alleluja! alleluja! – sûnnae campann-e a doggio,
mi davanti a-o miracolo da vitta m'inzenoggio.
Cantemmo Pasqua, i pampani da vigna, l'erba noëla...
torna ûnn-a prinçipessa chi paeiva ûnn-a çeniela!