Bolle de savon/Ova!
| ←E Terrasse de Zena | Bolle de savon de Ova! |
Canson de Natale→ |
Mûze, daeme a chitära e daeme o sciôu,
e veje, o vento in poppa, a bûscioa, e remme;
perchè no reste lí fûto, arrenôu
porzeìme e vostre moen, e tûtte insemme
vegnî zù testa e cû, de rûbatton
e sciûsciaeme in te l'oegia ûnn-a canson.
Sta votta (sensa aveì troppe preteize)
vorriae, se l'é poscibile, fâ celo:
o l'é tûtto de marca vëa zeneize
(o no ven da Berlin) o mae scigoelo:
l'ho taggiôu, pe dî tûtto, in sciä montagna
de Cianderlin, da ûn aerbo de castagna.
Ma no sò da che parte imprinçipiâ,
e me domando: - se poi fasso pillo?...
O chêu o me säta, ho a testa invexendâ,
no staggo fermo, schitto comme ûn grillo,
cianzo e rïo in ta stess'öa, conto de vesce,
e no sò manco mi cöse me tesce.
O pä ûn seunno: - in t'ûn anno quanta stradda!
l'Italia a va, d'ogni öa, sempre ciù ben:
l'é finalmente o giorno da cormadda,
pe dîla comme dixe i massachen:
Ova! - sto giorno o porta gotti e feste;
Ova! - che semmo a Trento e semmo a Trieste.
L'é chì sei giorni che tra carne e pelle
ûn senso de piaxeì me sento andâ:
sbraggi che van a-o çê, che van a-e stelle,
dappertûtto, pe Zena, in taera, in mâ:
mûäge, case, caroggi, o porto, e prïe...
comme a mae testa pä che o mondo o gïe.
E terrasse son tûtte pavesae;
de chì, de là, se vedde o tricolore:
da-i barcoin, da-e fessûe, da-i lûxernae
in scë gexe, a-e botteghe, in çimma a-e töre....
Bandëa d'Italia che ti sae a vittoria,
sempre te baxe o sô, te baxe a gloria!
De cöse belle a-o mondo ghe n'é tante:
bello o sô chi ven sciù da Portofin,
en belle in primmaveja tûtte e ciante,
a sciô sarvaega e a rêuza do giardin,
bella ûnn-a bocca chi ve ciocca ûn baxo,
ma l'é ciù bello assae questo ravaxo!
1918