Bolle de savon de Carlo Malinverni
Lontanansa
[p. 97 modifica]
Lontanansa

Me sovven: - quella seja
a sûnnava ûn adaxo:
l'ëa là de primmaveja....
Mi aveivo ûnn-a gran coae de dâghe ûn baxo.

In çê, a lûnn-a pinn-a;
e o bello ciaeo da lûnn-a
indoâva a sò testinn-a:
Mi beveiva l'amô co-a cantabrûnn-a.

Comme a fava co-e moen
cantâ, cianze a tastëa!
In ti cavelli e in sen
a l'aveiva ûnn-a bella rêuza thea.

M'avvixinavo a lê
quaexi a tocca e no tocca:
me paeiva d'ëse in çê....
Che vêuggia aveivo de baxâghe a bocca!

Cosci fresca! - che sae
a metteiva d'ammiâla!
Mi aveivo ûnn-a gran coae,
mi aveivo ûnn-a gran coae d'ammalloccâla. -

[p. 98 modifica]

Comme a l'é andaeta? - So
che chinandome adaxo
çercando a bocca sò,
quella seja gh'ò daeto o primmo baxo.