Bolle de savon/Da-o monumento de Mazzin
| ←Mascherinn-a, te conoscio! | Bolle de savon de Da-o monumento de Mazzin |
Commento→ |
I.
De ste neûtte passae, da-o monumento
de Mazzin, passaggiando alluveghïo
pe i tanti brûtti faeti - ch'ei capïo
za tûtti sensa che ve-i digghe - sento
(sento o me pâ?) co-e raffeghe do vento
che investe e scrolla i èrboi che gh'é in gïo,
comme ûnn-a voxe ammagonâ, sospïo
d'ommo ch'ha ûn dô de chêu: - mi da-o spavento
me fermo in sce duî pê: - tra e rovee e i pin
veddo, (o straveddo?) a-o ciaeo da lûnn-a pinn-a,
dä sò colonna vegnî zù Mazzin,
vegnî in taera d'asbrio: - perdingolinn-a,
(me pâ c'o sbragge) razza de Cain,
dunque, m'ei misso chì, proprio ä berlinn-a?
M'ei misso chì, m'ei misso chì, marmaggia,
comme fà d'ûnn'insegna o bûttegâ,
e i vostri voti en voti da majnâ,
e i vostri evviva! son fêugo de paggia?
Finimmola! ghe n'eì troppe in sciä taggia;
ghe vêu pe-i drappi sporchi ûnn-a bûgâ....
ma tûtta l'aegua no bastiae do mâ
pe fâ netta e ingianchî questa canaggia.
Sciù! finimmola; anchêu, presto: - doman
sae troppo tardi: - o popolo o l'é bon,
sto mae popolo forte, bello e san;
ma o vêu che i Giudda seggian, - con raxon -
brûxae c'ûnn-a camixa de catran,
e sciacchae comme a vipera e o scorpion -
1916.