Bolle de savon de Carlo Malinverni
Cocchetto e çigaa
[p. 172 modifica]
Cocchetto e çigaa
a Felice Oddone.

I
Son solo in casa, drento ä mae stansetta,
con ûn mëzo toscano chi no tïa;
cocchetto che pazientemente o fïa,
travaggio o verso, fabbrico a strofetta.

Ma me pä d'ëse ûn lûmme quande o spïa
perchè ghe manca l'êujo in ta lampetta;
o spettisce, o fà ancon ûnn-a sciammetta,
o s'oscuìsce, o fà o mocco... a l'é finïa.

No trêuvo ciù o cantin, no trêuvo o ton:
diggo a-e mûze co-a ciòccioa? - e cöse cäe
(donne! donne!) me mettan a-o landon.

A l'é finïa, Feliçe: n'ho ciù d'äe,
ho perso tûtto, - sghêuo, voxe, canson...
Coscì scciêuppan, passôu lûggio, e çigae! -

[p. 173 modifica]

II
A-o sô a çigaa in sce ûn rammo de castagna,
o in çimma a ûnn-a carassa, a tûtt'andâ,
imbriaega d'ûnn-a gossa de rozâ,
a l'impe co-a canson tûtta a campagna.

Mì, che me paeiva d'ëse ûnn-a vivagna
de canti, no sò ciù manco scigoâ,
tûtti dixan: ma c'o vadde a spigoâ,
co-a finisce con sto bêuga-bugagna.

Lê quande a neive a crêuve a valle e o monte
a l'ha, comme se dixe, in to stoppin....
ma ghe fà ûnn'ode o poeta: - Anacreonte.

Invece mì, quando scentiö dä scena,
no ghe sä, ghe zûghiae o mae chitarin,
ûn can che me mensunn-e in tutta Zena.