Bolle de savon/Che l'inse?
| ←Da San Françesco de Paola | Bolle de savon de Che l'inse? |
O Cappûççin→ |
| www.liberliber.it 2011 |
Viva Balilla! o zoveno
chêu popolan zeneize
che, son tosto duî secoli,
e giûsto de sto meize,
seccôu de vedde a Zena
çerte facce scassae
o l'ha dito: piggemole,
piggemole a sasciae;
che l'inse?... e o ghe desbrassa
ûn sascio, e o ciappa in pin
ûn tedesco: - pe-a ciassa,
da tutti i caroggin,
da e bûtteghe, da-i fondeghi,
da-i barcoîn, da-e terrasse,
zù, tûtti, addosso!... daeghele...
zù, tûtti, addosso!... strasse,
quello che a-e moen ve capita,
a meizoa cö cannello,
sasci, maghêu, diai, scandole,
o mortâ cö pestello...
E doppo? - a cantilena
do Steva pe-a çittae:
«viva ra nostra Zena,
viva ra libertae!»[1]
Perchè, sacciaelo, o popolo
ciù bon quande o s'addescia,
addio vexin!... i austriaci
scappan in quinta e sprescia....
De faeti doppo ûn secolo,
con tûtti i sò Radeschi,
a no ghe dà o viavattene
l'Italia a sti tedeschi?
e dalli, e picca, e arrosa
i emmo desenteghae;
ma... ma gh' é ancon quarcosa
che aspëta a libertae:
se dixe che in politica
bezêugna dêuviâ e pinse:
mi sento intanto o popolo
chi sbraggia ancon: che l'inse?...
1914.
- ↑ STEVA DE FRANCHI: Ra Libertae vendicâ l'anno 1746 a ri 10 Dexembre.