Bolle de savon/A taera promissa
| ←O sò ritraeto... | Bolle de savon de A taera promissa |
A bûgatta de Ninì→ |
6 d'arvi do 1919
L'ëa do quarantenêuve; de sto meize:
l'anno de bombe: - gh'ëa a rivolûzion:
fëo comme sempre, o popolo zeneize
nêutte e giorno o sûnnava o campanon:
pe-a libertae De Stefani e Rattazzi
moîvan; - nasceiva ä libertae Palazzi.
Palazzi, l'esemplare çittadin,
da-i zeneixi portôu 'n parma de man,
se pêu dî c'o sûssava cö tettin
i sentimenti do repûbblican;
e avendo dä repûbblica o battaeximo
a settànt'anni o l'é chì sempre o maeximo.
E anchêu, c'ûn pensciëo solo, vëgi amixi,
in gïo a-o nostro Palazzi se strenzemmo:
emmo i ciú tanti, scì, i cavelli grixi,
ma lê sempre a-o timon, noî sempre a-o remmo;
noî pronti ad eseguî; lê a comandâ,
e a nostra barca a filla in mëzo a-o mâ.
A filla in mëzo a-o mâ: - l'é dä vixin,
l'é in vista, poemmo dî l'é squaexi a tïo,
quella taera promissa de Mazzin...
e ne pä zà de toccâ o çê cö dïo;
a speransa a se fà sempre ciù viva....
Taera! - i majnae sbraggian montando a riva.[1]
- ↑ Versi scritti sulla pergamena miniata dalla Siga Adelina Zandrino e offerta dagli amici e dai soci dell'Associazione Mazzini all'avv. Goffredo Palazzi nel suo 70 anno, la sera del 6 aprile 1919 in un banchetto al Monte Rosa.