Bolle de savon/A Marino Merello
| ←Punto e a cappo | Bolle de savon de A Marino Merello |
A canson dell'Orbo→ |
Pe ti, Merello, e mûze no han segretti,
e han sempre a porta avèrta e spalancâ;
te trattan a pignêu e a fenoggetti,
e te dan o sò laete da tettâ.
Con lö ti fii a tûtt'öe comme i cocchetti,
con lö ti tesci a teja recammâ:
versci, strofe, cansoîn, odi, sûnetti....
Comme ti rimme, no ha tant'aegua o mâ.
E mûze a tì ne dan sempre, e a bezeffe;
se a limoxina a mi fan d'ûnn-a rimma,
son a segno de temme o danno e e beffe.
Segge comme a se segge, - anchêu mi metto,
pe date prêuva d'amicizia e stimma,
o to nomme in sce questo mae sûnetto.