Balin imbriægo
| ←torna a-i atre sciortie | Balin imbriægo pe-a gran sciortia de Foxinne l'anno 1823 - Strufuggi de |
| exemprâ conservao presso a Libraja Naçionâ de França |
IMBRIÆGO PE-A GRAN SCIORTIA DE FOXINNE L’Anno 1823.
Son tutte ciancie, che s’assêun-na a gente
Ch’a vêu vende vexighe pe lanterne
A canto a chi fa o sordo, e a chi me sente.
Ecco quello che dixe amagonôu
Ciù d’un vêgio portôu,
Ch’o s'arregorda ancon di tempi d'Accai,
Quando in mezo a Portoja
Se poeiva fa bardoja,
Con poche straççe, e doi roziggi asseizi;
O Canfora per Meistro de Capella,
O Craiser per Violin,
E quattro pellegrin-ne
Coa rantega e coa peja
Perchè ciù vin che seja
Se consumava o giorno de Cazasse,
E tutto couscisteiva in bonne brasse.
Oh! meschin, comme sei da compatî!
Amixi, vegnî avanti, stæ a sentî;
I tempi son cangiæ
Pe-a gloria no se stimma ciù i din-næ,[sic]
Se spende zù a balocco,
E i Cazaççanti vêgi
Vedendo tanti spêgi,
Tanto öu, tanti recammi, tante perle,
Tanti razi, vellui, e cose fin-ne;
Che pe pagâ gh’œu poççi de roscin-ne,
Se sentan confessâ
Che e Foxin-ne ne fan strasecolâ.
Sciù bevemmo in allegrîa,
Sciù trinchemmo in santa pâxe
Pe Cazaççe no se crîa
E meschin de noi chi taxe.
Foxinanti - Cazassanti - fæve avanti - tutti quanti,
Voemo a tin-na sbarrazzà[sic] - e stronelli improvisâ,
A l’onô do nostro Möu - confessemmo tutti in cöu,
Che de ciù no se pêu fa.
Arvî un pö sto caratello,
Dæme un pö de moscatello;
O l’è vêgio, e do ciù bon
E o no manda in strambeulon.[sic]
Bella figgia - chi se piggia - sta bottiggia,
Mi no a posso destappâ,
Ah! vegnîme un pö aggiuttâ.
Oh! che nuvea s’avvixin-na,
In sciâ testa me bæxin[-]na;
A ponente ghe lampezza;
Pâ che tron[-]ne in sciâ Çittæ,
Quanto cado, quanto sæ.
No sciortî, fradelli cai,
No bagnæ ste belle cappe,
O mæ c[o]êu o fa tippe tappe,
Mi me sento deslengoâ....
Ma a nuvea a l’è scappâ,
O Çê o se mostrâ netto comme un spëgio,
E questo giorno o no pêu fâse megio.
Bonne bande e ben vestîe,
Conçertoin da mävegiâ,
A Sciortîa de Sciortîe
A pê scîuti a deve andâ.
Quanto cæo, quanto splendô,
Torna forse inderrê o Sô?
Ciêuve fêugo in me veitæ!
Comm’à l’è, che no scappæ?
Ho cappîo, - hò zà mangiôu:
Chi me porta un pö in sciù[sic] Prôu?
Che fracasso, - ad ogni passo - d’ato e basso,
Dao fondo de montagne scinna ae çimme
Se sente i spai di forgai dä lontan,
Pà[sic] che bruxie o Bezagno da e gren zimme
In Çe gh’è un tremeleujo, un ramadan,
Gîasoi, gruppi, fontan-ne, röe, candeje,
Bastieivan pe fâ fêugo çento seje.
Ma bevemmo un caliçetto,
Che pe-o vin no se và in Cretto;
Che chi bagna o becco presto
No pêu temme ciù do resto.
Dæme, dæme a cantabrun-na,
Vêuggio inçâ sta damixan-na,
Ma zà l'êuggio o se m’appan-na,
No a sò manco donde infiâ.
Mescia a têra in mæ zuamento;
O che câdo che me sento!
Chielo chì, che fa mesciâ?
Che belliscimo Confaon!
Oh che ricchi Pastorali!
Foxinannti, ei ben raxion
De mostrâli, - de lodâli.
Bonne fighe, in mæ veitê[sic]
Gh’ei di trêuggi de dinnæ.
Cose voei coa sciabbra nûa,
Faccie neigre, malandroin?
Chì emmo c[o]êu, chì no se sûa,
Pe mill’atri semmo boin.
Ma.. .. capiscio, ch’a me gîa,
A l’è a Cascia de Foxin-ne,
Gh’è San Giacomo a cavallo
Ch’o ne fa tante tonin-ne
Che pe-a Fede o se gh’aççîa,
Brutti griffi, scappæ vîa.
Cose crîan questi gardetti
Con sto fêuggio de papê?
Cançonette chi êu accattâ,
Chi vêu lêze, a l’è chi lê?
Dæmea chì, che vêuggio vedde;
L’êuggio leze a chi nö credde.
Stæ a sentî Portoi canûi,
Comme anchêu se versa i scûi,
Quanto onô meita o sciô Piaggio
Che a ogni artista o fa o sò ommaggio
Co-i so versci coscì belli
Ch’o se meita dai Fradelli
Unna statua in secrestîa, . . .
Ma chi a testa a se me giâ.[sic]
Chi me ten? chi me da man?
Tutti dunque se ne van?
In sto moddo se me lascia
Sensa fiato, e testa in cascia?
Dæme, dæme un pö a bottiggia,
Chi risponde? . . . chi me a piggia?
Vinetto = ti è s[c]cietto = delizia do c[o]êu,
Ti scangi = ti arrangi = e trofie in raviêu.
Che faccin = che voxin;
Gardettin = pellegrin = cantæ un pö
Ah! taxei = da o piaxei = mi beviò.[sic]
Compagnie, passæme avanti,
Nêuve cappe, impronti, e canti;
Croxi, Cristo, argento, ed öu
Se va a rubbi per o Möu.
Compâ, beivi, te o daggo de c[o]êu,
No gh’è giorno ciù bello d’anc[h]êu.
L’allegrîa da per tutto a se spande
Per a festa de Zêna a ciù grande.
Vêgi, zuveni, donne, figgiêu,
No gh’è giorno ciù bello d’anc[h]êu.
Sunnoi, sunnæ, che mi vêuggio cantâ
E pellegrin-ne, dæme chì o libretto;
Se a mæ voxe troviei ch’a l’è stonâ,
Ghe n’a colpa, credeîlo, o caliçetto.
Cose diggo, chi a bevûo?
A me testa a pâ un imbûo.
Se pêu da che quattro gotti
Fassan dî tanti strambotti?
Çento miggie = co e bottiggie
Se fa a testa camminâ;
Vaddo all’orsa, = chi m’asmorsa?
A mæ testa a pâ un fogoâ.
Son forse in Pontexello,
Dai træuggi,[sic] o da o trippâ?
Vestîo son da Fradello,
Son in Ravecca, o in mâ?
Chi me spiega questo zerbo? . . .
Taxei che chì gh’è un erbo. . .
Oibò a l’è un-na ferrâ,
Vêuggio montâghe sorva, êugg(g)io o mæ giusto,
Vêuggio sensa sponcioin piggiâme un gusto.
Oh che roba! che ricchezze!
Cose veddo! cose sento!
Quante maome! che stranezze!
Oh che giorno! che portento!
Camalli, carbonê,
Tenzoei, e perucchê,
Ve a zughæ cö roscin, perdingolin-na!. . .
Questa nêutte v’aspêto in ta cantin-na
Se o fusto aleitemmo,
Divento un malemmo:
O e daggo, o e prometto
Pe un pö de vinetto.
Chièlo quello faccettin
Ch’o fa sciene cö palosso?
Oh che bello Cavallin!
Pâ che a tutti o vagghe addosso.
Ah! o l’è lê; San Giacomin,
Mi ve prego, comme posso,
No me dæ de ciatton-næ,
Son mi ascì di vostri Fræ.
Zùro, zùro, oh! che fracasso!
Fa o violin cö controbasso,
Sempre muxica a ogni passo,
Sempre torcie, e tutte a sguasso,
Largo a-o Möu, ch’o l’è o Papasso.
Zin, zin, zin, fa i ritornelli,
Viva a marcia di Fradelli;
Pän zà stæti miliziotti,
No fra i arme, ma fra i gotti.
Viva o Möu, beivi compâ,
Viva, viva, sciù tocchemmo,
Stemmo in trappa, no cazemmo,
Questo rammo = o m[']e grammo.
Compâ cao, no me lasciæ,
Sostegnime pe caitæ.
Vaddo in broddo da o piaxei:
Voi Foxin-ne, solo sei
O mæ gusto in mæ davvei.
Compâ, allegri, mi ve lascio,
L[']e zâ[sic] tardi ... mi pixaggio...
Tutto quello che o Sciô Piaggio,
O l’a dito in ta Canson,
Che de tutte a l’è o campion,
Paivan fase, ma son vee,
Dæghe lode, e con raxion.
Mentre . . . ahi! ahi! se stocca o rammo,
O se ceiga comme un lammo.
Comme cazze un ciappassêu,
Coscì scuggia in scii rissêu,
Da-o piaxei ciù che dao vin
Zu da i fèri Sciô Ballin.