Avertimento a-i catollichi 1890

Avertimento a-i catollichi crestien

Apendixe 6 de "An Italian Campaign: Or, The Evangelical Movement in Italy, 1845-1887", Londra, 1890
Exemprâ conservao inta libraja de l'universcitæ de Harvard

Mi v'avviso tutti quanti
Non lasciæve lusingâ
Da sti quattro protestanti
Che ve særcan d'ingannâ

A vedili in apparenza
Ve pan gente du Segnû
Ma poi dopo son avari
Come Giudda traditû

Quando parlo di protestanti
Non m'intendo de parlâ
Sorve a quelli meschinetti
Che se son lasciæ ingannâ
Ma m'intendo de combatte
Solo quelli capuriuin
Che passaggian per l'Italia
A ingannâ i povei meschin.

A sentili a predica
Ve pan santi d'indavei
Ma toccæghe a seu bottega
Che poi dopo ghe vediei
Vegnan li coa sacra bibbia
Che pan angeli du Sè
Ma in ristretto nu fan pe atro
Che per invidia de mestê.

Sotto u manto da scrittua
Ghan un fin ingannatû
Vegnan chi a dâ addosso ai prævi
Per vegnî poi prævi lû
Son vegnui anche chi a Zena
Pe ciantâ a seu religion
Ma fra-mezo ai sen ministri
Ghe za nata a divixion.

Questa gente figgi cai
Son nocivi a Societæ
Perchè mettan a discordia
In fra-mezo au figgio e au puæ
Perchè u puæ e veu sta cattolico
E se u figgio u nu veu sta.
E de li ne vegnan guerre
Che nu peuan mai ciù quetä

In te quelle povie case
Ghe succede tanto mä

Se peu dîlo francamente
Che u diau u ghe fa u ferrä
Quella bella e santa paxe
Che regnava in quelle case
U Segnò ô l’ha tolto via
Per caxion dell’erexia.

Questi quattro protestanti
Lu son proprio ingannatui
Che de sette sacramenti
Non osservan manco duî
Lu negan l’eujo santo
Negan a confermazion
Negan l’ordine e ô matrimonio
Negan anche a confescion.

Lu nô veuan fa penitenza
Non ammettan ô zazun
E di ponti da scrittua
Non osservan manco un,
L’osservanza da quaresima
Non ne fan nisciun dovei
E au venerdi e au sabbo
Mangian carne a ciu non puei.

Lô dixian maa du Papa
Dixian maa da confescion
E ô seu scopo non è atro
Che distrugge a religion
Lu non pregan a Madonna
E negan a seu verginitè
E da Santa Madre Gexia
Son za tutti condannæ

A Gexia di cattolici
A le li ben apparâ
Ma in ta giexia protestante
Nu g’han manco d’Artâ
Lu non tegnan manco a Croxie
Dove l'é morto ô salvatô
E non veuan manco vedde
Un immagine dô Segnô.

Gesù Cristo coi seu apostoli
Quando favan l’orazion
S’inchinavan proprio in terra
Propriamente in zenoggion
Ma invece i protestanti
Quando fan e seu orazioin
Se ne stan la belli driti
Che pan tanti campanin.

In ta Gexia protestante
Non se vedde apparemento
Ma in te case di ministri
Ghe adornou d’ou e d’argento
Lu in cangio d’adornase
Una casa pe-ô Segnô
Lu s’adornan i salotti
Che coscì sei godan lô.

I ministri protestanti
G’han e stanze addamaschæ
E g’han tanti poveretti
Che son li tutti strassæ
Loro vivan in gran lusso
Van vestii de panno fin
E se-a marcian in carozza
Che pan tanti milorduin.

De vedili li all’esterno
Ve pan pin de religion
Ma poi doppo nell’interno
Han ô cheu come un prion
Se per sorte un poveretto
U va a serca i dinæ d’un pan
Lu ghe dixian che le ozioso
E ô matrattan comme un can.

Lô g’han tanti poveretti
E sei veddan li a patî
E langueuii ne-a miseia
Ma nô-i sercan de soccorì
O se pure a qualche amigo
Lô ghe fan qualche favô

Lô ghe dan de quella roba
Che non serve ciù per lù.

E coscì fan a limoxima
Come quella de Cain
E in faccia a Gesù Cristo
A nu va manco un quattrin
Queste cose che ve diggo
E son tutte gran veitæ
Perchè mi con i protestanti
Queste cose l’ho provæ

Amiæ ben che ghe fra lô.
Serti tali Inquisitoi
Che han scosso u dolce Giugo
Per puei megio fa l’ozioso
Questo non pe iddio dô Çe
Ma per puei pigiä mugiê
E a vedili ve pan santi
Poi son marzi intolleranti.

Ve credei che questa gente
Vegnan chi per fa dô ben
Vegnan chi a mette a discordia
In framezo ai buin cristien
E fin tanto che in Italia
Ghe saia sti flamazioin
In Fra-mezo de famigge
Ghe saiâ sempre de quistioin.

In fra-mezo ai protestanti
U ghe regna l’ambizion
E fra-mezo a lu ministri
U ghe sempre a disunion
Ma in cangio fra i cattolici
Li ghe regna l’unitæ
E ghe regna a santa paxe
In fra-mezo a Societæ

Perchè a fede di cattolici
A le stæta ben fondâ
Le lasciâ da Gesù Cristo
Che nisciun a peu atterrâ

E se nòi staiemo fermi
Ne-a cattolica religion
Stemmo serti e ben segûi
Che andiemo in salvazion.

Mi v’avviso puæ e muæ
A guardâ i vostri figgin
E tegnî li ben distante
Da sti quattro flamazioin
E procurè de daghe a tutti
Un-a Santa educazion
E insegnaghe a sta costanti
A-a Cattolici religion.

Questa gente amixi cai
Veuan portane a confosion
E fa si che nell’Italia
Nu ghe segge ciu d’union
E non basta grandi guerre
Rinovæ anche fra fræ
E nisciun tranquillamente
Porria vive in societæ

Se navviemo i euggi a tempo
E se lasciemo incapussâ
Quando saiemo in ta rè
Nô porriemo ciú scapâ;
Che da-e guære religiose
Noî tegnimolo a moria
Su é eu pagine doro
Che conta ne possa storia

Miserabile l’Italia
Se divisa in ciù frasìon
Pei partii religiosi
Diventemmo i ciu meschin
U nu ghe ciu breve strada
Per fa mille religioin
Che coa Bibbia protestante
Stampâ senza annotazioin.