A Colombiade/Canto tredicesimo
| ←Canto dozeximo | A Colombiade de Canto trezeximo |
Canto quatorzeximo→ |
| ediçion Sordo-Mutti 1870 e en stæti reixi con êu e ôu. E notte in zeneize son do Pedevilla. |
CANTO TREDICESIMO
ARGOMENTO
Doppo d’avei mostróù con sovraumana
Virtù l’Angeo a l’Eroe tante stûpende
Cose e bellezze, che l’Americana
Region ricca e vastiscima a comprende;
O gh’indica unn-a serie lunga e strana
De futûre politiche vicende
Da maexima, e i eroi ciù rinomæ,
Che in quella han comhattûo pe-a libertæ.
1
L’Eroe da-ô so pensceo profondo e tristo
Dä voxe de l’Arcangeo ô l’ëa riscosso:
D’un mondo nêuvo, lê ô ghe dixe, acquisto
Pe-ô vegio immenso, un breve schisso, un sbosso
Imperfetto, Colombo, ti æ zà visto;
Aoa ti conosciæ coscì a l’ingrosso
E scene varie e i atti, a-i quæ sä averta
(Nêuvo teatro stupendo) a to scoverta.
2
Saiva cosa superflua ô voeî predite
Quanto ti pêu pronosticâ ti stesso;
Che quando i ammirabili e infinite
Regioîn e tære doppo ô bon successo
Da to impreisa a l’Europa sän descrite:
Pe gloria e aviditæ subito e spesso
Seguitiân nêuve pubbliche e private
Spedïzioin i to indizii e e to pedate.
3
Comme quando pe-i monti o in t’uña maccia
A-a fin i chen a son de gii e d’anasto
Han scoverto d’un çervo forma e a traccia,
A-a nêuva preisa, a-ô ricco e lecco pasto
A turba di caccioî pronta a se caccia;
Coscì a-e tære corriä de questo vasto
Mondo l'Europa pe trovâ ne-e stesse
Scienza, dominio, novitæ, ricchesse.
4
Scicchè non solo a Spagna in questa tæra
A spediä nêuvi barchi armæ e provvisti
D’ommi eccellenti in arti, in scienze e in guæra
Pe fâ nêuve scoverte e nêuvi acquisti;
Ma anche l’Italia, a França, e l’Inghiltæra
Mandiân scienziati e capitañii e artisti,
Emoli e concorrenti con a Spagna
Pe dividise ô paise da Cocagna.
5
Queste scoverte in fæti nêuve e vee
Sorgenti de vantaggio e de risorsa,
Portiàn në moltitudini europee
Pe ô progresso do spirito e da borsa,
E gran rivoluzion d’usi e d’idee;
Scicchè se remesciàn de queste in forsa
In un campo ciù vasto e largo çercio
L’arte, a scienza, a politica e ô commercio.
6
No te creddi però, che ô to progetto
Umanitario e tutto santo in questo
Mondo da ti scoverto ô l'agge effetto
Comme ti ti vorriesci e coscì presto:
Son in parte incapaçi d’un concetto
Coscì sûblime e coscì giûsto e onesto
Tanti che te seguivan finna chì,
E tanti che vegniân doppo de ti.
7
Pêu forse êse propizia ä razza ûmana
Gente lê stessa senza ûmanitæ?
Gente guiddâ chi solo da uña vâna
Gloria e da un’esecranda aviditæ?
Accompagnâ ben spesso da uña strana
Sûperstizion, da inimane crûdeltæ?
Gente insomma composta de birbanti
Feroci avventurieri e de mercanti?
8
L’Europa in questa tæra a pêu trasmette
Forse quanto lê stessa a no possede?
A pêu queste tribù semplici e sccette
Unî tutte d’amô ne-a stessa fede,
Mentre de tante discordanti sette
Religiose lê mæxima a l’è a sede?
Forse a ghe pêu portâ uña religion
Senza uña liga de superstizion?
9
Forse a questa nazion sarvæga e fea
A civiltæ l'Europa a pêu portâ?
Ma cose l’è atro a civiltæ europea
Che uña barbarie in maschera, o velâ?
E che tanto lontaña a l’è dä vea
Civiltæ, comme a placca inargentâ
Da-ô veo argento, e quanto l'è da l’öu
Diverso ô cincisbæcche, o scimilöu?
10
E uña region a poeî ciammâ civile,
Quando a lezzi arbitrarie a l’è sùggetta,
E a un giogo indegno e a ûn ordine servile;
Ne-a quæ comanda ûn despota a bacchetta
Tristo e feroce o ûn tirannetto vile,
Chi è misso sciù da-ô fratte o dä donnetta;
Ne-a quæ l’è in esercizio, anzi in onô
O sbiro, ô boia, ô paddre inquixitô?
11
In breve un paise, dove a tirannia
A soffoca ogni bella aspirazion?
Dove traviando dä diplomazia
Se va con maizia a pûbblica opinion?
E dove fanatismo e ipocrixia
Fan guæra ä rettitudine e ä raxon?
Dove a giustizia a litiga e a contrasta
Co-i privilegi e e distinzioîn de casta?
12
Dove i sperzûi në corti son ripieghi
E non delitti; e un magazzin immenso
Son e reggia de titoli e d’impieghi;
E e curie seportûe son do bon senso
Pe-e moneghe e pe-i fratti, e a-i prævi e a-i ceghi;
Dove l'è offerto a-ô re sempre öu e incenso,
E a quelli eroi, che han travaggiôu per lê,
Spesso se ghe fa beive axôu e arfê?
13
Anzi nêuvi disordini e malanni
A questa gente invece de coltûa
Portiân tanti Europei, parte tiranni,
Parte imbroggioîn pe calcolo e natûa!...
Coscicchè chì ghe sä pe di anni e di anni
D’eventi un caos, de cose uña mescciûa,
D’idee e pascioîn opposte un gran contrasto,
E de vizii diversci un nêuvo impasto.
14
E in quanto ä tirannia, da-i vostri eroi
Sän trattæ queste misere tribù
Comme razze de scciavi, e i scciavi poi
Cresciân in questo mondo ancon de ciù!...
Sän portæ fin da l’Africa chì i moi,
E assoggettæ a ciù indegna scciavitù,
Trattæ, avvilii, vendûi a questo e a quello
Comme bestie da soma e da maxello!
15
E verso e tûrbe placide e tranquille
Cose diö poi di orrende crûdeltæ,
Pe portâghe via l’öu, e de l’öu mille
Votte ciù caa e preziosa a libertæ?
I feroci antropofagi di Antille
(Se ô mangiâ a carne ûmana n’eccettuæ)
N’en per ninte ciù barbari e ciù fei
Di civili cattolici Europei!...
16
Coscicchè tante impreise maledette,
Che han ciù aia de conquista e d’invaxion
Che de scoverte a ûn santo fin dirette,
Portiàn chì da prinçipio a confûxion:
S’ûniàn chì a-i miti antighi nêuve sette
Con nêuva specie de superstizion,
E sä spesso ne-ô cûlto mesccia e ûnia
L’impostûa vegia ä nêuva ipocrixia.
17
A-ô sangue ûmano sparso in scë i artæ
Do prexonê, do zoveno, da figgia,
S’accresciàn nêuve vittime scannæ
A l’odio, a l’ambizion, a l’ingordiggia.
Sän anarchie e imbroggi e societæ,
I governi ingiûstizie e parapiggia;
Sän peste di ommi senza civiltæ
Ommi civili senza ûmanitæ!...
18
Ma se fä tanto ô Spirito perverso,
Ch’ô segge per ûn tempo do to viaggio
L’exito da-i to voti assæ diverso,
No te lasce a speranza nè ô coraggio:
Non è a-i to sforsci indifferente o avverso
O Çê, e da-ô tempo aspëtine ô vantaggio:
Da to scoverta, da to impreisa ô frûto
Solo ô l’è ritardôu, ma non destrûto.
19
A-ô mondo ogni progresso e megioamento
O fixico, o politico, o morale
O l'è do mondo stesso un movimento
Un atto necessaio e naturale;
Ma ô l'è ûn travaggio fadigoso e lento
Do tempo e d’un destin provvidenziale,
Che spesso appeña ô l’è ne-ô lungo gio
De vicende e de secoli compio.
20
A stenta a progredî l’ûmanitæ,
Comme l’ommo ô fadiga a sviluppâse:
L’è tarda a riformâse a societæ,
Comme ô l’è l’individuo a l’educâse:
Stentan nazioîn e popoli e çittæ
A costituîse e a ben consolidâse
Ne-i so driti e raxoin, comme in natûa
Stenta a materia a fâse soda e dûa,
21
Anzi comme ô cotton, a laña e ô lin
Primma de diventâ d’informe massa
De roba bella teia e panno fin,
O se batte, ô se pëtena, ô se passa
In mezo a un meccanismo tutto pin
D’ingranaggi e de punte, chi ô scarlassa
Streppelandolo tûtto pe purgâlo,
E rendio bello sciocco e raffinâlo;
22
E sciccomme uña graña de semensa
Primma de trasformâse in frûto o in sciô
A se corrompe tutta pe l’influensa
Dissolvente de l’ûmido e do sô;
E sciccomme ô metallo ô non è sensa
Rûzze ô mescciûa de tæra e de bruttô,
Se primma ô no se pûrga in mezo a-e braxe
E a-e sciamme d’ardentiscima fornaxe;
23
Coscì pe-a ciù feliçe de reazioîn
In questi paixi tanto matrattæ
Nasciä da-e ciù tiranniche opprescioîn
O ciù nobile amô pe-a libertæ;
E fra-e barbarie e fra-e superstizioîn
Se fä stradda ô progresso e a civiltæ,
E se fondiä in sciä mæxima anarchia
O drito e ô regno da democrazia.
24
L’è veo, che i primmi passi e e primme prêuve
Pe-a libertæ riusciàn vane o imperfette:
Questa vasta region, ch’a se descrêuve
Aôa a-ô to sguardo, de reppublichette
Tutta a sä sparsa tribolæ da nêuve
Magagne, frûto de partii, de sette
Fra lô discordi, e opea de prescidenti
O imbecilli, o tiranni, o turbolenti.
25
Ma sän i stessi guai uña semensa
Ch’a portiä degni frûti ä so stagion;
Nasciûo e coltivôu con diligensa
L’erboo da libertæ in questa region
O cacciä rammi esteisi e un’ombra immensa,
E ô l'aviä specialmente a-ô Settentrion
Fêugge e scioî fresche, frûti boîn, feconde
Semenze, fûsto san, reixe profonde.
26
A questo punto l’Angeo ô sguardo e ô dio
O vortava a man drita e disegnando
Con questo a l’orizzonte un largo gio
O l'indicava ô paise ampio e ammirando,
Che va a-ô Mississipî ô Missuri unio
E ô Tenessee con l’Ohio attraversando,
E særa a-o Nord con un volûmme immenso
D’ægue e ûn rapido corso ô san Lorenso.
27
Ecco, Colombo, ô continuava poi,
Un vasto campo, dove finalmente
Vinçiàn, tronfiàn poche miggiæia d’eroi
Combattendo un straniero prepotente
Ricco d’arme, de nave e de tesoi
Con costanza e coraggio sorprendente;
Tanto ô Çê ô sä propizio a-i sforsci e a-i voti
E a-ô slanço ardio de quelli boîn patrioti.
28
De questi prodi ô trionfo ô sä completo
Frûtando a nazionale indipendenza....
Là ô dominio europeo tristo e indiscreto
O cazziä con l’intrigo e a prepotenza:
Portiä un governo liberale e queto
Svilûppo da civile intelligenza:
Dä lêugo a-ô dryto popolare ô vegio
Arbitrio, e a l’eguaglianza ô privilegio.
29
Coscicchè vinti e allontanæ i foestê
E fûsi nell’ûnion tûtti i partii,
Se formiä uña nazion diletta a-ô Çê
De popoli divesci fra lô ûnii,
Con un libero patto, solo a lê
Sottomissi per lezze, costitûii;
Comme figgi sûggetti a uña gran moæ
Tutti liberi e eguali comme fræ.
30
In somma uña reppubblica grandiosa
Se formiä de reppubbliche picciñe,
Unie in prinçipii e in gara luminosa
De virtù militari e çittadiñe,
Da regordâne l’epoca famosa
De glorie greche, pûniche e latiñe;
Modello de progresso e d’equitæ,
Campo d’industria e de prosperitæ.
31
Reppubblica ne-a quæ tanto sä ûnia
Co-a gentilessa ûrbana e con l’interno
Ordine a libertæ e a democrazia,
E tanta forza senza appoggio esterno
E senza ô fasto e ô ton da monarchia
Sä tanta dignitæ ne-ô so governo;
E sä in mezo da stessa mescolanza
De sette tâ concordia e tolleranza;
32
E in scienze e in arti e fin in Galateo
In questa ghe sä in somma un tâ progresso
Da fâ restâ confûsi tutti a reo
Quelli che pe ignoranza o per eccesso
D’antipatia fra-ô popolo europeo
Han pe-i reppubblicani odio e dispresso,
O son panegiristi sempiterni
Di statûti di re e di so governi!
33
E quest’ûnion de Stati indipendenti,
Bella, sûblime, sacrosanta ûnion,
Che a dovieva abbrassâ tûtti i viventi,
Che han ô don da parolla e da raxon,
Da duî patrioti pe virtù eminenti,
E pin de patrio amô, vêui d’ambizion,
Con sapienza mirabile e energia
A sä iniziâ, diretta e stabilia.
34
Çittadin di ciù probi e ciù erûditi
Un a-i so compatrioti ne-ô cammin
Do progiæsso ô sä guidda co-i so scriti
Formandoli virtuosi çittadin,
E conosce façendoghe i so driti
Pe procacciâse poi miîgio destin
O con legali insurrezioin, o armæ
Quando no basta a pûa legalitæ.
35
Lê ô compiliä ô Statûto ciù compio,
Dove in scë basi de l’amô fraterno
Sä do popolo ô drito stabilio,
E ô doveî e ô mandato d’ûn governo,
Ch’ô non è un monopolio, nè ûn partio,
TSé a ncgazion da lezze de l’Eterno;
Statûto ch’ô portiä ben infinito
A-a patria e onô a-ô patrioto ch’ô l’ha scrito.
36
L’atro, ä tribûña lingua franca e ardia
E in campo invitta spâ di liberali,
O fâ tremâ a potenza ciù fornia
De marittimi eroi, d’armæ navali;
Potenza a quæ, quanto moæ giûsta e pia
A l'è verso i so figgi natûrali,
A l'e tanto moiegna ingiûsta e trista
Co-i figgi d’adozion e de conquista.
37
Lê, ripeto, domando ô feo liocorno
E ô lion ingleise in campo e a l'assemblea,
O fä risplende in questa tæra un giorno
E stelle americane in ta bandea:
E in mezo a mille paixi tutt’intorno
Zà scciavi da tirannide europea
O fä nasce, aumentâse e stabilîse
A potenza ciù libera e feliçe.
38
Pù questa esente e libera da taccia
A no sä d’ingiûstizia tutt’a reo,
Comme spesso no-ô l’è uña bella faccia
Da quarche cicatrice, o brigoa, o neo,
Dä camoa ô frûto, oppù da quarche maccia
Fin ô mæximo sô, questo l’è veo!
Stato a-ô mondo no gh’è, ch’ô scie perfetto,
Comme ûn ommo no gh’e senza difetto.
39
E questa maccia, ch’offûschiä ûn pö ô cô
D’ûn illûstre bandea vivo e gentile
E d’ûn arma a ciù nitida ô splendô,
A sä a træta di neigri ingiûsta e vile,
Avanzo d’un governo corruttô,
D’un popolo de genio mercantile;
Ma ô scassâ questa maccia ô sä ne-i voti
E ne-i sforsci de tûtti i boîn patrioti.
40
Ma chi ô tentiä pe-ô primmo ô sä mâvisto,
E da matto trattôu, comme sûccede
A chi avversa do volgo ogni ûso tristo,
E pe-ô ben di so scimili ô l’è erede
Do zelo filantropico de Cristo:
Che se stimma ô so slanso e a viva fede
Ne-ô progresso do popolo ûn delirio,
E lê degno d’obbrobrio e de martirio.
41
Ma no sä vano ô seme con virile
Costanza e intrepidcssa sparso intorno:
E lagrime e i sospii d’uña gentile
Donna vegniân a fecondâlo un giorno,
Che in patetico, vivo e terso stile
A-i ommi a rinfacciâ l’ingiûria, ô scorno
E ô gran torto che fan, tegnindo oppressi
E scciavi ommi so scimili, a se stessi.
42
Dä cabanna de Tom, scciavo virtuoso
Quanto infeliçe, un tâ lamento, ûn crio
Allôa ne-ô paise vasto e popoloso,
Che l'Ohio ô l’attraversa, ô sä sentio,
Ch’ogni animo e chêu retto e generoso
O ne restiä commosso e intenerio;
E contro tanta infamia fän solenne
Protesta mille voxi e mille penne.
43
Ma ciù grave e imponente a sä a protesta
Quando circa duî tersci da Nazion,
Parte a ciù saña, liberale e onesta,
A s’apponiä co-i arme ä ribellion
De quelli indegni, i quæ pe uña fûnesta
Vertigine vorriân scinde l’ûnion,
Union feliçe, opea sûblime d’ommi
De chêu giganti, e d’intelletto sommi.
44
Liberali degeneri e insensæ,
Posteri indegni de miggiæa d’eroi,
Lô reneghiân progresso e ûmanitæ
Con voeî perpetua a scciavitù di moi,
Scciavi lô stessi de l’aviditæ
De guadagni non retti e de tesoi,
Scciavi d’ûsi i ciù orribili, de vegi
Pregiûdizii e d’ingiûsti privilegi.
45
Egoïsti, nemixi d’un governo
E d’ûn popolo amigo do progresso,
Che vorriàn abolio l’obbrobrio eterno
Di popoli civili, ô scciavo oppresso,
Ammermandone i peisi e ô crûssio interno,
Lô n’aviàn nè verghêugna nè ribresso
De spartîse da quelli, e separæ
Armâse contro i mæximi so fræ.
46
No riûsciàn ne l’intento: do profano
Scisma n’aviàn castigo e disonô:
O popolo europeo e l’americano
O veddiä con disgûsto e con orrô
Quanto reo çittadin, quanto inûmano
Quant’ommo vile l’è ô speculatô,
Che a-e peñe pe-i so calcoli ô pêu reze
D’un atr’ommo e avventâse a chi ô proteze!
47
Ma non aviä sorte e progresso eguale
(Proseguiva vortandose a manciña
Nicamoele) a region meridionale:
Questa pe lungo tempo a sä a sentiña
O d’uña libertæ, che a ûn’immorale
E anarchica licenza a s’avvixiña,
O de soprûsi de tiranni vili,
O de guære e de torbidi civili.
48
Sbarchiàn chi spesso de refùggio in traccia
De provinçie europee tutti i refûi,
I condannæ de forca in contumaccia,
De non êse scoverti e conosciûi
Sperando, oppù credendose dä caccia
Di giandarmi e di sbiri ciù segûi,
Approfittando di remesci interni,
Oppù de l'indolenza di governi.
49
Vegniän chi relegæ in scï bastimenti
Tanti discoli e tanti scapestræ,
E figgi de famiggia impertinenti,
Ch’en de grave distûrbo ä societæ,
E de tedio e de peiso a-i so parenti,
Pe êse disciplinæ, cegæ, astallæ
Sotto i lerfoîn do capitañio e sotto
E imprecazioîn e i casci do pilotto.
50
Vegniän chi pù i rabbin a predicâ
A fede co-a morale do Spagnollo,
E pastoî mercenari pe tosâ
Pegoe meno ammaissiæ senza controllo,
E miscionai venali pe ciantä
A sacra vigna in t’ûn terren ciù mollo,
Che grosse ô ghe prodûe lûcide e belle
Tutte d’öu o d’argento i axinelle.
51
Vegniân pù spinti dä necescitæ
Çercando a-e so finanze uña risorsa
Artisti, meistri, contadin spiantæ,
Negozianti, merçæ, parte de borsa.
E de credito parte limitæ,
O pin de puffi e d’appetitto in forsa
Do commercio incagliôu, da carestia,
Do scarso guägno, o poca economia.
52
E vegniän chì i ciù asperti di europee
Nazioîn, anzi di mæximi italien
I to Liguri pù da-e due rivee
Specolando in sciö vergine terren,
O in scë ricchezze intatte de minee,
Oppù ne-ô contrattâ con quell’Indien
Parte in sciä so imperizia e dabenaggine,
Parte in sciä so indolenza e infingardaggine.
53
Chì vegniän finalmente (e forse questa
De tanta e coscì varia emigrazion
A sä a ciù compatibile e a ciù onesta)
Quanti schiviàn galea o reclûxion,
O portiàn via sarva pe miâco a testa,
Perchè convinti de cospirazion
Contro i nemixi da democrazia
Riusciân a elûdde i sbiri e a polizia.
54
Dä furia do torrente reazionaio
Fra quanti in questo lêugo aviàn un scampo
Ghe sä fra i primmi un ommo straordinaio
Pe ardî, pe genio e pe fortuña in campo,
Proscrito, comme rivoluzionaio,
Da chi ëa primma, abbagliôu da un breve lampo
De gloria, ä testa da rivoluzion,
E poi pe ûn trono a-ô fianco da reazion.
55
O sä italian e ligure e mainâ,
Comme ti ê ti, quest’esûle immortale;
E ô sä de quelli che vorriân fondâ
In Italia un governo liberale,
Con combatte e pe sempre annichilâ
Dispotismo monarchico e papale,
Idea de tutti i nobili intelletti,
Voto de tutti i chêu gentili e retti.
56
Ma aviàn i boîn patrioti a trista sorte
Che tocca a chi ne-i prinçipi confia,
Tradimento, prexon, o exilio, o morte:
Da i onge e da-ô furô da tirannia
Scampôu e sarvo malapeña ô forte
Campion d’Italia e da democrazia,
O s’appægiä, çercando in queste nêuve
Tære un refûggio, a ciù brillanti prêuve.
57
Ne-a libera çittæ, fondâ do rio
De la Plata a disegno d’anfiteatro
In sciä sponda scinistra, stabilio,
Lê chì ô troviä d’indipendenza un atro
Campo potente e ûn esercizio ardio,
E de impreise e ciù eroiche un nêuvo teatro,
Portando a guæra a un dittatô vixin
Prepotente, sacrilego, assascin.
58
Cappo de poca zoventù in divisa
Semplice e liscia de camixe rosse,
Ma in faccia ä morte intrepida e decisa,
Lê ô fä conosce in campo quanto posse
A fede ne-ô so drito, non divisa
Da chêu e da mente non sûggetti a scosse,
Sorve a ferocia, e non zà ardî virile,
Di sbiri infami d’un tiranno vile.
59
Esercitôu pe uña chinzeña d’anni
In questa schêua famosa e originale
D’un eroismo a-e forze di tiranni
E a-i governi dispotici fatale,
Mentre ch’ö solleviä da-i so malanni
Un popolo e un governo liberale,
O pensiä pù a guarî da patria i guai,
Che ne l’exilio ô no scordava mai.
60
Lê appeña ô l’ê avvertio, che finalmente
Pe a libertæ l’Italia a s’è riscossa,
Ne giûbila ô so chêu, sublimemente
N’è a so anima esaltâ tutta e commossa!
Subito ô lascia questo Continente
Co-i so compagni da camixa rossa,
E ne-a tæra europea câdo d’amô
Patrio e de zelo ô torna in zù con lô.
61
Con lô a l'Italia tutta sollevâ
De poche ma tremende baionette
L’aggiûtto ô porta e da so eroica spâ;
E ô fa prodezze che sentie e lette
Fan tutte ô mondo a reo strasecolâ
Con quelle armi gloriose benedette
Dä giustizia e da-ô drito, e non da fratti
Fanatici, o da pappi o tristi o matti.
62
O so impeto, ô so slanso, a so manea
De combatte, e so rapide vittoie,
E e glorie da so libera bandea
Non notizie segûe, genuine istoie,
Ma pariàn un romanzo o un epopea;
Ma sän fæti provæ, vive memoie,
Libbro sûblime, autentico e fecondo
De veitæ lûminose a tutto ô mondo.
63
Da questa storia illustre e straordinaia
I popoli impariàn, che s’en unii
Ne-a fraterna concordia necessaia
Pe guiddâ a-ô ben commûn tutti i partii;
Cazze a diplomazia e van a l’aia
Ultimatum, sanzioîn, veto, regii,
Coscì ha uña bolla de savon dipinte
Tæra e aia; a scciêuppa e no veddeî ciù ninte.
64
E i popoli d’Europa gh’impariàn,
Ch’ô merita ne-a guæra ô stesso vanto
O genio nobilisciscimo[sic] italian,
Ch’ô l’ha in belle arti, ne-a poexia, ne-ô canto;
Perchè capaçe de trattâ con man
Ferma e coraggio in campo a spâ con quanto
Inzegno in paxe ô sa trattâ scôpello,
Compasso, penna, cetra, arpa e pennello.
65
Veddiân a mille exempi e a mille prêuve.
Che l’Italia, ciammâ tæra di morti,
A fa tûtti scrollâ quando a se mêuve
Anche i troni ciù stabili e ciù forti,
E a fa pù temme i re, che se rinnêuve
Ne-i so vei figgi a libertæ risorti
Quell’antigo eroïsmo in paxe e in guæra
Fatale a tutti i despoti da tæra.
66
A-i foestê so vexin mæximi poi
Che lezion lûcidissima e solenne
O no dä questo conduttô d’eroi,
A-ô quæ sangue italian scôre in te veñe,
Ch’ô vêu libera a patria e non tesoi,
Premio de so fadighe e de so peñe.
Che solenne lezion, diggo, a-i foestê
O no dä co-i so eroi guiddæ da lê?
67
Uña lezion solenne a Vaise e a Commo
E tûtt’intorno ne-a region vixiña
Aviä ô desposta austriaco da quest’ommo,
Che l'ardî di Zeneixi e a carabiña
E di Lombardi a baionetta e ô sommo
Coraggio ô vâ assæ ciù che a discipliña
E ô nûmeo di so Croati, ommi valenti
Ciù ne-i sacchezzi che in combattimenti.
68
E a n’aviä un’atra a vanitosa Fransa
Co-i so instabili figgi e non tranquilli,
Che a taccia i Italien ne-a so arrogansa
D’ommi morti, de popoli imbecilli;
Mostrando che fra lô no gh’è mancansa
D’eroi scimili a-i Cesari e a-i Camilli
Doppo mille e mille anni ancon gaggiardi
Comme ëan contro de Brenno e di so bardi.
69
E ô ghe dâ uña lezion, quando l’erede
Da religiosa ræ e da spâ profana
De san Pê (de politica e de fede
Liga spâ e ræ a ciù eterogenea e strana)
Pe tornâ ne-a so regia-santa sede
Zà trasformâ in reppûblica romana,
O dâ indulgenze a chiunque aviä l’impegno
D’assegûâghe co-i arme a spâ e ô triregno.
70
Perchè primma che torne a-ô Vaticano
Grazie a-i cannoîn d’ûn Parvenu sperzûo
In sciö trono ô Melchisedec romano,
Fä roziggiâ da pochi sostegnûo
Pe ûn pesso quest’eroe reppûbblicano
A trenta mia Françeisi ûn osso dûo
Nell’eroica difeisa da çittæ
Di Brûti e di Cattoîn resuscitæ!..
71
E un'atra â-fin ô ne dä pù a l’Italia
Contro ûn partio, che co-e raxoin ciù fase
A uña moderazion cauta ô l'egualia
A vile inerzia da virtù incapaçe;
Mostrandoghe cö fæto quanto a sbalia
Se a credde de no poeî einançipâse
Da-i estere tirannidi da lê
Senza ciammâ in aggiûtto atri foestê.
72
Lê ô fä vedde che trêuva uña nazion,
Ch’a vêu insorge uña valida risorsa
Ne l’entûxiasmo da rivolûzion,
Non deviâ, nè interotta ne-a so corsa;
Contro da quæ l'è inûtile ô cannon,
E i eserciti perdan a so forsa,
Subbaccæ, comme un argine o uña sponda
Subbaccâ da-ô torrente ch’ô l’innonda
73
Decantiàn i viventi in versci e in prosa
E ripetiàn i posteri stordii
De quest’eroe a spedizion famosa
Pe liberâ ûn di stati ciù compii,
E uña tæra d’Italia a ciù ubertosa
Da-ô pezo di so despoti abborrii,
E azzunze ûnze mioîn d’ommi ä meitæ
Da Nazion zà vixiña a l’ûnitæ!
74
L’Eroe ô parte da Zena e ô l’è seguio
Solo da mille ch’en de chêu giganti,
Da-ô volgo di imbecilli compatio,
Maledetto da-ô volgo di mercanti,
E in Sicilia sbarcôu con slanso ardio
O s’avanza, ô se batte, ô vinse... e avanti,
E in çinque o sei battagge e in pochi giorni
Son libere çittæ, borghi e contorni.
75
Poi con rapido slanso e sorprendente
Appeña quella tæra a l’è redenta
O säta da quell’isoa a-ô Continente
Contro e forse tiranniche ô s’avventa:
L’impeto de fermâne inutilmente
Con conseggi autorevoli se tenta,
L’Europa diplomatica sorpreisa
Invano a fremme, e l’è compia l’impreisa.
76
Comme de Marzo a-ô comparî do sô
Se scioglie a neive, se deslengua ô zeo,
Davanti a quell’eroe pin de terrô
Se discipan do re partenopceo
I schifosi satelliti, e con lô
Scentan ô poliziotto e ô fariseo,
E l'è libero ô stato a-ô tempo stesso
Maggiô d’Italia e ciù de’ tutti oppresso.
77
Ma comme se compiä uña de impreise
Ciù belle, ciù feliçi e straordinaie
Në nêuve e antighe cronache compreise
De tante lotte rivoluzionaie,
Lotte orrende l’è veo, ma quando offeise
Son l'equitæ e a giustizia necessaie,
E quando ô drito conculcôu da-a forsa
O n’ha pe sollevâse atra risorsa?
78
Poche eroiche legioîn improvvisæ
De volontarii da camixa rossa,
Azzunti a-i mille in campo decimæ,
A despeto di sforsci d’uña grossa
Armâ e de battaglioîn disciplinæ
Dän d’ûn tiranno a-ô trono tale scossa,
Che a impedîne a roviña nô sän boîn
I pûntelli di scciêuppi e di cannoîn.
79
I fæti de Marsalla e de Milasso
E i trionfi de Volturno e Maddaloni
Proviàn a so despeto a ogni gradasso
Do dispotismo e a-i so politiconi,
Che contro l’entuxiasmo, ô slanso e ô brasso
D’ommi liberi e ardii despoti e troni
Në reclute sforzæ, ne-e spae vendûe
Non han forza e virtù, che i assegûe.
80
Ma che onô n’aviä poi, che ricompensa
Questa falange intrepida, che forte
Non pe nûmero d’ommi, ma pe immensa
Virtù a non aspiriä che a-ô vanto e a sorte
De rende a patria indipendente sensa
Risparmiâ sacrifizii e temme a morte?
Che ricompensa a l’urtimo, che onô
N’aviä ô so valoroso condûttô?
81
Se me sentieî svelâ cose esecrande
Da fâ fremme pe sdegno i chêu virtuosi,
Voî ombre illûstri, sacre e venerande
De Dante e de tanti atri ommi famosi,
Che un’Italia eî ideôu libera e grande,
E voî ombre de tanti generosi
Martiri per aveî tentôu a manea
De realizzâ questa sublime idea;
82
Se tristi, diggo, e iniqui traviamenti,
Ombre onorate, ve tocchiä sentî,
Ne-ô vostro sdegno no saggiæ[sic] inclementi,
E l'Italia (per Dio!) no maledî!
N’azzunzeì nêuvi crûssii a-i innocenti,
Che a so marso despeto han da soffrî
Verghêugna e peña pe-i erroî de tanti
Degeneri italien, vili e birbanti!
83
No maledî a l’Italia, perchè inclûsi
No scien ne-i figgi da maledizion,
Tanti, ch’en meno rei, perch’en illûsi,
Guasti e pregiudicæ ne l’opinion
Pe opea d’indegni, che se son intrûsi
A-a manêuvra da barca da Nazion,
Co-i deboli sûperbi, ûmei co-i forti,
Tiranni a-e Banche e vili scciavi a-e Corti.
84
Eccove a gratitudine pertanto,
Ecco ô premio, cö quæ sä retribuio
Questo famoso eroe, quest’ommo tanto
Da patria benemerito!... Un partio
Potente allôa in Italia ô se dä ô vanto
(Vanto spesso co-i opere smentio)
D’êse ô ciù franco, onesto e liberale
Promotô do progresso nazionale.
85
Ma in veo partio de rette opee incapaçe
Ch’ô n’aviä bandea netta e senza macce,
Programma senza norme ambigue o fâse,
Partio, ch’ô l’aviä sempre, perch’ô sacce
Segondo che tia ô vento regolâse,
Duî peizi, due mesûe, duî coî, due facce;
Partio corrotto, ch’ô cangiä in eterno
In postribolo politico ô governo;
86
E in bazar diplomatico e mestê
De vende impieghi a chiunqne è inetto e tristo,
E i so mæximi popoli a-i foestê,
Scimile a un Giudda, ch’ô vendeiva Cristo.
Pezo de quelli Ebrei primma de lê
Ghe ô fræ minô ciù sccetto e ciù ben visto
Dä famiggia streppandolo e da-ô poæ
A-i foestë l'han vendûo senza pietæ!
87
Aôa questo partio tristo e potente
Deciso e congiurôu pe dâ ô reverso,
A-i sforsci do gran Ligure e ä so gente,
Dä setta farisaica non diverso,
Primma ô trattiä da matto e da imprudente,
E poi quæxi da sûddito perverso,
Çercando d’infamâlo con sospetti
D’ambiziosi o d’anarchici progetti.
88
Ma quando lê ô vediä procede avanti
A-ô compimento da so bella impreisa
Con passi e con successi da giganti,
Allôa ô no risparmiä nè arme, nè speisa
Ne de foestê intervento e d’intriganti
Perchè segge a grand’opera sospeisa!..
Oh! Italia, Italia, pe êse uña nazion
Libera, oh! quanto ti æ da cianze ancon!
89
Benchè de scrutinâ no m’è permisso
Ne-i celesti indelebili decretti
L’anno e ô giorno a redimite prefisso,
Pù i voti e i sforsci de quegl’ommi eletti,
A-i quæ l'è ô grande incarego commisso,
Sän ä fin (comme spero) benedetti!..
Ma primma do gran giorno, torno a dî,
Quanto ti aviæ da cianze e da soffrî!..
90
Primma, o tæra infeliçe, ti veddiæ
Con disgusto e con somma indegnazion
Che ûn regno guadagnôu pe-a to unitæ
O sä, perchè ne-a pubblica opinion,
Regallo de l’eroe da libertæ,
Quæxi aççettôu pe forza e con ghignon,
Comme un diamante, ch’ô l’è misso in dio
D’uña chi spôsa ûn zoveno mainvio.
91
E ti veddiæ, che un paise nêuvamente
Liberôu da ûn tiranno, e ch’ô s’acquista
Con suffraggio spontaneo e indipendente,
Da ûn partio ch’ô se vanta progressista
Mâtrattôu, sgovernôu barbaramente
Comme paise straniero e de conquista,
O sä un gran campo a tutti i boin de guai,
E d’infamie a-i breganti e a-i reazionai.
92
E ti veddiæ un governo ingiûsto e ingrato
Con giudizii e motivi iniqui e storti
Destrûe, desperde, comme un aggregato
De faziosi, un esercito de forti;
Quæxi ô l'avesse con azzunze a-ô Stato
Nêuva gente e risorse, mille torti;
Comme femmina d’agno furibonda,
Ch’a divora ô so masccio, chi a feconda!
93
E serviâ de pretesto per palliâ
Tanta invidia, ingiûstizia e antipatia,
Che zoveni, ch’ëan boin pe riportâ
Sette vittoie splendide dä fia,
Ean gente scarta e inetta pe ûn’armâ,
Se primma n’ëan passæ tutti ä trafîa
Da lunga schêua do passo e do moschetto,
E do fêugo a plotton e a martelletto.
94
E finalmente o Maccabeo do giorno
O gran Vallace, ô Leonida moderno,
L’Arminio de Milasso e de Volturno,
L’Eroe da proclamâse in sempiterno
Pe-e çittæ de l’Italia tutt’intorno
Milziade in guæra, e Aristide a-ô governo,
Ne-a so marcia trionfale ä to ûnitæ
Arrestôu tutt’assemme ti ô veddiæ.
95
D’azzunze nêuvi volontarii a-e file
Decimæ do so esercito impedio,
Vilmente pe interesse e animo vile
Da tanti di so mæximi tradio;
Da l'idea e dä minaccia de civile
Guæra non imposcibile atterrio,
O differiä l’impreisa pe eseguîse
A tempi megio e in moddo ciù feliçe.
96
E scimile a ûn Fabbrizio a ricompensa
Ricûsando d’ûn’opea giûsta e boña,
Che gh’è offerta dä pûa condiscendensa,
Ma non dä splendidezza da coroña;
Onori e dittatûa (frûto d’immensa
Gloria) e a bella penisoa ô l’abbandoña,
E â so isoletta nêuvo Cincinnato
Solo ô ritornâ e çittadin privato.
97
Benchè scimili in merito fra lô
Pù ne-ô destin quanta diverscitæ
Fra ô moderno e l’antigo dittatô!..
Questo ô lascia comando e dignitæ
E de guerriero ô torna agricoltô,
Lontan da-ô brio e da-ô lûsso da çittæ;
Ma co-a soddisfazion, chi è sempre ûnia
A un’impreisa magnifica compia.
98
Lê ô se ricrea pensando (coll’antiga
Virtù romana coltivando a villa),
In mezo ä volontaria so fadiga,
Che a patria a l’è per lê sarva e tranquilla,
Sgombra do tûtto da l’armâ nemiga,
E che a gente romana a se recilla
In feste allegre e fra ûn’immensa gioia
Zà libera e segûa pe-a so vittoia.
99
Ma tâ consolazion, pægio riposo
Ne-ô spontaneo retio non è concesso
De due Sicilie a-ô dittatô famoso;
In mezo a-ô so travaggio a mente spesso
Gh’offûschiâ ô pensceo tristo e doloroso,
Che ô popolo romano ô cianze oppresso,
Fra un pio pastô, chi ô spella, e un birrichin
De Gallo vegnûo a fâghe l’aguzzin.
100
E che a bella Venezia ancon sûggetta
A-e continue puntûe vive e moleste
Co-e quæ, de tormentâla se diletta
Co-ô becco e e grinfie l’aquila a due teste[1],
A se lamenta invano a meschinetta,
Che l'aggiûttan con ciance e con proteste
(Mentre l’aggiûtto d’ommi armæ ghe vêu)
Benchè zà forti e libere e so sêu!..
101
Spesso co-i êuggi a tæra e ô fronte basso
Fermo e appoggiôu ä vanga lê ô sä visto
Ne-ô so campo non vinto da-ô strapasso,
Ma immerso ne-ô pensceo profondo e tristo,
Che ancon ô Paise ô no gh’arvisse ô passo
D’entûxiasmo e virtù megio provisto
Pe riparâ con uña nêuva lotta
Un sbaglio fæto e l’opera interrotta.
102
Oh! lê feliçe, quanto ô l’ëa gaggiardo,
Se ne l'esecûzion do so progetto,
O non avesse avûo tanto riguardo,
Tanta fidûcia verso un gabinetto
O tentennante, o perfido e boxardo
Quanto lê franco, generoso e sccetto;
O credûo ô non avesse ciù adôçia
Cö früto de so parme a monarchia!
103
Feliçe lô, se a-i retti e salutari
Avvisi ô foise stæto meno ostile
D’un atro gran patriota, ûn di ciù rari
Pe gran coraggio e gran virtû civile;
Quanto lô ne-i impreise militari
Brasso ô l’aveiva, animo e chêu virile:
Quello ô l’ëa in previdenza unico e sommo,
Forse per questo ciù de lê grand’ommo.
104
Feliçe, diggo, ch’ô l’aviæ capio,
Che chi va a-ô campo pe uña santa idea,
Se a corte regia a-ô vedde andâ mainvio,
Anche con l’arma regia in ta bandea,
Anche a favô d’un re, lê ô l’è tradio
Da chi sente e so glorie mävoentea;
E ô reîzega de sparze un innocente
Sangue prezioso eroico inutilmente!
105
Perchè ti æ da saveî, che benchè Zena
A no supera forse e a non egualia
Tutte e çittæ da gran penisoa amena
Pe ô nûmero d’eroi dæti a l’Italia;
Pù a l’ha zà misso, e a l’ha da mette in scena
A mæxima non pochi ommi de valia
Tutti quanti ommi celebri e da reo
E de nomme e de credito europee.
106
Lô in Ti a ghe dä ô ciù grande e ciù compio
Mainâ da vegia e da moderna istoia,
E a ghe dä poi ben presto ô ciù agguerrio[2]
E prudente Ammiraglio in Pagan Doia,
E ô popolano ô ciù animoso e ardio
Ne-ô bravo zovenetto de Portoia,
E ûn Paganin, ch’ô fä sentî fra queste
Zone terrene a melodia celeste.
107
Lê a ghe dä in Assarotti ô ciù perfetto
Institûto di Mûtti e rinomôu,
D’un governo dispotico in Corvetto
O ministro ciù disintcressôu,
In Cavalli do ligure dialetto
O poeta ciù gentile e delicôu,
Lê duî pittoî da invidiâ poco a schêua
Stessa romana, cioè un Cangiaxo e un Piêua.
108
Per lê aviä infin (sublime privilegio!)
L’Apostolo ciù grande a Libertæ!..
Tanti atri a-ô mondo nêuvo e a-ô mondo vegio
Moderni e antighi tanto decantæ,
Sän megio in mezi, ma in virtù non megio,
Non ciù sublimi, ma ciù fortunæ!
Fan l'ommo grande anima grande e ardia,
Fede e non sorte, a lotta no a riuscia!..
109
Lê ô l’andiä esercitando, corifeo
De vei patrioti senza pompa e sciato
Senza misteri e solo armôu de veo
Amô patrio ô ciù lungo Apostolato
D’ogni tempo e do mondo tutt’a reo,
Affrontando filosofo privato
Solo co-â sola penna l’odio e a raggia
Di potenti, di scribbi e da marmaggia.
110
Vili calunniatoî, di quæ fecondo
L’è ô volgo avaro e ô volgo prepotente,
Fän mille sforsci pe cacciâlo in fondo
Da chintaña ciù bassa e ciù fetente
Pe rendilo schifôso a tutto ô mondo;
Ma a galla lê ô torniâ gloriosamente
Tanto ciù illustre quanto ciù scöxio,
Quanto ciù calpestôu, ciù regaggio.
111
Da mille parti ghe cacciàn addosso
Mille anatemi ipocriti buffoîn,
Vili egoïsti che slançian un grosso
Nembo d’ingiûrie e de maledizioîn,
Tentiàn e corti con sentenze in rosso
Destrûine l’existenza e i opinioïn;
Ma anatemi e condanna capitale
Sän scassæ dä giustizia nazionale.
112
Mettiàn pù pe ecclisälo di atre stelle
Fûrbi intriganti de rimpetto a lê,
E quæ parriân assæ de lê ciù belle
A-i ommi illûsi, e degne de stâ in çê;
Ma s’andiàn ammortando tutte quelle,
Comme stoppin zà sciûto in sciö candê;
Lê ô brilliä torna, comme a-ô so splendô
Doppo d’ûn breve ecclisse torna ô sô.
113
Feliçe, a bella Italia, se schernie
Da-i maligni e da-i scemmi non cûræ
No foisan e so idee, comme ûtopie;
Nê-i so prudenti avvisi disprezzæ,
Comm’ëan zà de Cassandra e profezie;
Che no saiva un aborto a so unitæ,
Nè a so vea indipendenza un dexideio,
Nè a so libera carta un vitupeio!
114
Chì Nicamoele (pe un pittin sospeiso
O so discorso) ô continuava a dî:
In questa mæ miscion non è compreiso
De svelâte de ciù de l’avvegnî:
Solo m’è imposto in quanto ti æ intrapreiso
O doveî d’aggiûttâte e sostegnî
Tanto ciù in tempo, che t’appægian sommi
Guai di demonii a maizia, e a furia di ommi.
115
Son sarvi pe miracolo do Çê
(Benchè a nave a l’è persa) i figgi e i bravi
To socii, e pe miracolo sta in pê
A colonia e a çittæ che ti lasciavi
In custodia a Marcena e a Bertomê;
Ma se trêuvan per atro in mezo a gravi
Imminenti pericoli i to fræ,
I to figgi, i to soci e a to çittæ.
116
L’è in pericolo grande de Fernando
A virtù in quell’isoa ciù vixiña,[3]
De Diego a vitta a sta pericolando
De træ Antille maggioî ne-a ciù picciña[4];
I Selvaggi irritæ van macchinando
A-a to colonia l’ûrtima roviña;
Va dunque, a tûtti porta un pronto aggiûtto,
O mæ ti l'aviæ in tûtto e dappertûtto...
117
O panorama chì ô s’allontanava,
L’Angeo e a lûxe elettrica a spariva;
Solo ûn debole lûmme ghe restava,
Che dä cea de l’Aurora ô se partiva
Che a l'orizzonte appeña a s’affacciava;
Colombo a-ô ciæo de questo ô descroviva
Vixin a-o schêuggio, do so barco perso
Avanzo, un pâ de remme e un gosso inverso.
118
Lesto d’ûn mezo approfittando allôa,
Che ô Çê ô ghe porze ä so salvezza intento,
O se spinze in te l’ægua fin ä gôa,
O l'addrizza a barchetta e ô gh’intra drento
E verso l’isoa ô ne dirizze a prôa:
Quella a l’arranca a-ô mæximo momento,
Comme da ûn chi agge cosa che ghe premme
A viva forza spunciâ in zù da-e remme.
- ↑ Quest’ottava a l'è stæ[sic] scrita quando Venezia a non ëa ancon passâ da-ô governo dispotico e tirannico de l’Austria a-ô sgoverno do regno costituzionale de l’Italia.
- ↑ Ho misso chì Pagan Doia, fra-i sommi ammiragli a preferenza de Dria Doia, perchè patrioto ciù sincero e virtuoso.
- ↑ L’isoa da Trinitæ.
- ↑ L’isoa da Giammaica.