Çittara zeneize/Rimme marinaresche/Quando Maxiña, solo d’affaççâse

by Gian Giacomo Cavallo

←Questo pâ de nazelli de çinqu’effe

Çittara zeneize - Rimme mainæsche de Gian Giacomo Cavallo Quando Maxiña, solo d’affaççâse

Quando per ammortâ ra sò fasciña→

Zena, Franchello, 1745

XX.

Quando Maxiña, solo d’affaççâse
A vista dro maroxo in sciù ro scœuggio,
Fa deventâ ro Mâ portopigœuggio,
Che veggo re persoñe stupefæte,*

Mi per cangio, che sò che, d’allargâse
Ra borrasca, in mi tutta l’arrecœuggio,
Che ro mæ cœu, scontrando œuggio con œuggio,
Corre perigo de no prefondâse,

Nesci! diggo tra mi: son ben da ben!
No san, se ben ro Mâ pâ tranquillîo,
Che ra fortuña è chì, sì no ra ven?

Zà che son guerçi (se no pecco a Dio)
Che pòsseli innorbî de là da ben!
Così con ro cœu cœutto me ne rio.