Çittara zeneize/Rimme marinaresche/Cose me vâ che naveghe e comande
| ←Lonzi da voî, mæ cœu, comme hò da vive | Çittara zeneize - Rimme mainæsche de Cose me vâ che naveghe e comande |
L’ammartellao Ballin→ |
| Zena, Franchello, 1745 notte do Prien |
XXX.
Cose me vâ che naveghe e comande,
Mæ cœu, per capitañio uña galera,
Se, reduto a ra netta puradera,
Son scciavo incadenao per mille bande?
Che ogni trei dì con tente scorribande
Çappette e peste l’ægua dra Rivera,
Se son lì sempre a ro mæ sicutera,
Con l’añimo a covâ re vostre bande?
Spesso a piggiâ ra Carta Amô m’exorta.
Dopo aveira curlâ per mille venti,
Per porto o me fa vei ra vostra porta.
Saçio dra Carta e dri sœu curlamenti,
Vózo carta, ra raggia me trasporta,
Ne façço tente carte con ri denti.