Prose rimæ/O Suicida

by Nicolla Baçigalô

←No

Prose rimæ scrite per ûso domestico de Nicolla Baçigalô O Suicida

Unn-a vixita a-o Duilio→

Za pubricao into Lunaio Regiña do 1884

O SUICIDA

1
Un giorno, ûn boenetto
Imberbe, patîo,
Che o paiva ûn sciûscetto
Se o tiäva o respîo,
C’ûn fosso pê masca,
Cavelli in bûrrasca,
O giâva — o regiâva
Da-e spende do Po.

2
A bella, a speransa
Do povëo figgiœu,
Con poca costansa
C’ûn sascio pe chœu,
Delûso a l’aveiva
D’ûn ätro a l'ardeiva^[1]
Affetto — ciû aççetto,
Invece do sò.

3
Ma cöse l[’]è o vive
Delûso, reietto?
Percöse sorvive
A-o primmo si affetto?
Che importa ûnn-a vitta
Coscì derelitta,
Co-a morte — se sciörte
Da tanto patî!

4
E intanto che o giâva
Do fiûmme pë sponde,
Perplesso o l’ammiâva
Quell'ægue profonde,
E o dîva « c’ûn botto
Me caccio là sotto,
E addio — l[']è finîo
Sto stento da mûî!

5
Ma veddime a galla
Bexinscio, desfæto,
L[']è mëgio ûnn-a balla...
C'ûn colpo ben dæto
Finiscio da forte
E trœuvo ûnn-a morte
Ciû bella — de quella
Che l'ægua a me dà!

6
E o côre in t’ûn bosco
Con l’arma fatale,
O çerca o ciû fosco
Pe-o scopo fatale,
E a-o triste reciocco
Do crîo dell’allocco,
In bocca — o l’imbrocca...
Ma o colpo o no va!

7
Se sparo, me sciorte,
Me schitta a çervella,
Çerchemmo ûnn-a morte
Ciû blanda, ciù bella,
Che a salve e mæ forme,
Che a seggie conforme
A-o fæto — chi é stæto
Origine a-o mâ!

8
Scegliemose quella
Da lenta asfissia;
Pe-a morte ciû bella
L'ho sempre sentîa,
Se piggia ûn tanon
C'ûn pö de carbon,
E senza — violenza
Se lascia scûggiâ!

9
E o côre in ta stanza
Con questa so idëa,
O piggia da sansa
O n’impe a braxëa,
O tappa con cûa
Qualunque fissûa
Che a morte — a no sciorte
Tramëzo a-o barcon!

10
Restæ dä cuccagna
Zà fæta co-e figge,
Gh’ëa ancon de sciampagna
Dôe belle bottigge;
L’amîgo ô e retîa
De sorva a sganzîa,
E o taggia — a ligaggia
Cô tirabûscion.

11
Ah primma che sciorte
Da-o carcere dûo,
Benefica morte
Te devo ûn salûo,
Oh vitta de stento,
Te lascio contento,
I mali — mortali
Me i metto derë...

12
Intanto o destappa
O vin de sciampagna,
O celebra ô lappa
Che o pâ ûnn-a cavagna,
Zû gotti a derûo
Van dentro all'imbûo,
Che o tenta — ma o stenta
De resise in pë.

13
Coraggio che sento
Vegnî l'asfissïa.....
Respîo zà con stento,
A testa a mæ gîa,
Me sento mancâ...
Zû l'ûltima gôâ.....
E dosso e — bordosso
O va in sce-o sofà.

14
O lûmme o s’ammorta,...
Sä forse o carbonio...
Zà drîto in sce-a porta
O l'angeo o ô demonio,
Se pösa attendendo
L'istante tremendo,...
Fatale — letale
A nœutte a se fa...

15
De voxi indistinte...
Un lento respîo...
Poi zitto... ciû ninte...
L’è tûtto finîo...
O spëgite in questa
Tragedia fûnesta,
Amante — incostante
Tiranna di chœu!

16
Profonda, silente
A nœutte a se passa;
Zà l’alba nascente
Dai veddri a trapassa....
E co-e brasse averte
Lì, pallido, inerte,
Co-a calma — da salma,
L[']ê o povëo figgiœu!

17
Ma a sæiva ûnn-a vescia
Da mæ fantaxia?
O morto o se mescia...
O l’anscia, o respîa...
Co-i œuggi riaverti
Immobili... inçerti,
O vedde — e o no credde
Che morto o non è.

18
I sensi o repiggia...
Ammiandose in gio,
O vedde a bottiggia
Con l'œuggio smarrîo...
O gotto... co-e scuâgie...
I mobili... e mûâgie...
O pensa — o ripensa
O çerca ûn perchè...

19
Son morto o son vivo?
Che storia a l[']è questa?
Ciû penso e n'arrivo
A mettime in testa,
Percöse, s'ëo morto,
Son torna risorto
E senza — frequenza
Travaggia o polmon?

20
E senza ritardo
Seguendo st’idëa
O çerca cô sguardo
O fissa a braxëa...
E o vedde... oh locciôu!
Che lè s’ëa scordôu,
Pe-a sprescia — ûnn-a vescia
D'aççende o carbon!

1. "E ûn’ätro a sceglieìva" into Lunaio Regiña do 1884