Peire

Gran cose in fin significa ro pei,
Segondo razze, ma s'un mé patron
Vuoe savei cos'o l'è, dighe in canzon,
Sei così camoggin che non ro sei?

Persego

Questo persego chì dro pomin grosso,
Vuoe dí chi avia ri matti a re suoe perseghe,
Ghe corran, comme dixan, con re perteghe
Ma o proverbio vuoe dí dro spartilosso.

Meire

Beneito sé de Zena in fin re ville,
Onde re frute d'agra qualité
Son si dose, che puoéran zuccaré,
Fin re meire sarveghe, e meire grille.

Boin boccoin

Belle frute in America se vè
Ma gh'hemmo a Zena serti buoin boccoin,
Che chi ne gusta, in sciù ra feta fin,
Ri ciamma con raxon boccoin da Rè.

Setron

Fra queste frute lé porta ro vanto
Ro zeneise setron, se no m'inganno,
L'è bon, l'è san, l'è fruta tutto l'anno,
L'è fruta in ogni vaso, in ogni canto.