Vuoe spartine fra noi
Ma sciù ro verbo in somma principá
Gh'è ra carne, ch'havea[sic] quest'animá.

Non ghe stemmo a pensá
L'era deto a ro spirito in un tá muoeo,
Che ro corpo è restoù de carne vuoeo.

Dro resto ho feto un vuoeo
In tro terren ciù grasso, e l'ho caccioù
Sott'un costo de succa sotterroù.

Scrito sciù gh'ho lascioù
O ti che passi, chì gh'è un animá
Se ti oe savei chi l'è vatt'a speggiá.


Relation a ro Sig.r Zan'Andria Spinnora dro testamento e morte dolorosa dell'Aze de sò Signoria.


Lustrissimo Patron,
In fin sotta ro concavo dra Lunna
Ri gusti duran poco, in concrusion,
Se orba veramente è ra fortunna,
Vá poco orei parlaghe d'in tra mira,
Perchè à tira de tira
Re bastoné da orbi da taston,
E fra re suoe ministre ciù forbie
Con re qué pá che tenti danni a porte,
Da puoe secondo mie,
Ra ciù fiera de tutte a l'è ra morte.