Ma che diró de voi, com’é raxon,
Che ra benignitae de Dorothea
Passa Giunon, Anthea, Giove e Plûton?
Voi me poressi dî dhe puoco Amó
A non vegnive ûn puoco a vixitä,
Dapué che son vegnûo, ma stae ascotä,
Ché quella caveró fué d’ogni erró.
Imprima o sa che ghe son servitó,
Che senza veira non porreiva stä
E, se non poesse, me faré assostä,
Ni resteré per chioggia, vento o só.
A Leze doi viaggi son vegnûo,
Ni v’ho atrouao, perch’eri in Lavagnuera,
Ro qua per mille votta é ve sarûo
E pué son staeto dötrae votta fuera
Con mae compagni: questo m’é accadûo:
Raffae vostro ro sa con Mariuera.
A Diann-a Paveisa
Sotto a ra töre de ro Brandä
Tütti ri ommi pan chiú piccin:
Mi che ghe passo seira e mattin,
Chiú che ra veggo, chiú erta me pä.
Sotto a ra töre de ro Brandä
Se va a ra stradda de San Giûlian,
Ma ri ambiziosi tiran lontan
Che ra so ertezza n’êuran mermä.
O Diann-a cara, no te adirä
Se quarche votta ro to amorin
T’intra in ra stanza comme ûn moxin,
Perché o passó senza pensä
Sotto a ra töre de ro Brandä.