 |
Questa pagina a no l'è stæta corretta. | |
Marionetti
Ûnn-a votta creddeivo – oh! che bezûgo –
che solo Zane o fesse i marionetti....
se dà, – tûtto dipende da-i speggetti
che ûn costo de viovetta o pagge ûn brûgo.
Allöa, vivendo se pêu dî a taston,
quelle creddeìvo e vee teste de legno:
bräo merlo! bon pe dâ drîto in to segno!
gh'ëa in mi, se vedde, a stofa do coggion.
Sciorbivo tûtto, allöa comme vangelo,
chêu aværto e braççe larghe, ad êuggi streiti;
e sensa sghêuâ due dîe ciù in sciù di teiti,
posso vantame d'aveì fæto cielo.
* *
Chi fasso ûnn-a parentesi, – e d'asbrîo
torno ûn momento a quelli tempi cäi,
quande pappà, mammà, lalle, messiai,
mamme, serve, figgiêu, allevæ e da nîo,
tûtti! – s'andava a zêuggia grassa, a-o teatro
de Vigne: – Zane lì o fava mävegge,
e o fava "per stûpô drizzâ re çegge:"
a-o mondo comme lê trovæne ûn atro!
