 |
Questa pagina a no l'è stæta corretta. | |
Primma de tûtto, ciappite,
mæ cariscimo Rocco,
de paole cö battæximo
zeneize, – c'ûn bon ciocco
de Portoia o de Prê,
da Mænn-a oppû do Cian...
no piggiâ ûn schincapê,
Rocco, in te l'italian.
Çerto ghe vêu do sæximo,
e ghe vêu do criteio
a no çerne ûn vocabolo,
pe-a gran vecciaja, pejo;
o ûn de quelli de fabbrica,
l'é veo, tûtta nostrâ,
ma che, mæ cäo, de fraoxo
bezêugna mançinâ.
Son pe ûn poeta e parolle
e tinte d'ûn pittô:
sole e slighæ, son sciolle,
ûnie ben, han do cô;
cöran con l'ægua e o vento,
cantan cö roscignêu,
