parola che disse lo Segnó de ello, zoè che inter li fijor de le femene no era nao maor de Zoane Batesto, monto me par grande cossa a pensar che ello è maor homo de tuti, e pu cha maor, persochè ello è angelo in carne; e questo è dito da lo Segnor Ihesu. E sam Bernardo dixe che ello a strapasao de li nove ordem de li angeli e si è pasao a la ateza de li sarafim. Chi porea dir tanto de ello che no sea pu? Doncha taxemo e arecomandamosege quanto noj possamo, che li piaxe de pregá per noj che noj possamo vegnir a la gloria eterna. Amen.*


E voio scrive una bella vixion de questo sanito beneito che e inteixi una vota; che unna annima fo levá a la beá contemplacium de vita eterna. E quela par vej li ordem de li angeli e de li santi davanti la sedea de Dee, caum in la soa sedia; e inter elli e Dee gi parea co[sic] fosse un spacio belissimo, a moo de unna piaza. Questa annima stava davanti a Dee e homo de la Vergem Maria soa Maire; e in mezo de questa piaza era unna prea preciosa reunda como unna mora de morim e quasi de quella grandeza. E erage doj scarim, e la gente eram tuti intorno la piaza. E sum questa prea, in lo mezo, si era lo grande baron meser sam Zoane Batesto, era drito e guardava in la faza de Dee, e parea che ello avesse un capello in testa, a moo de unna coronna, como quelle chi se inpenzem a la testa de li santi, e avea indosso la vestimenta de lo gameo. E per quella gi parea cognoselo Zoane. E questa vestimenta parea tuta de oro fim, e li pej de la pelle resplendeam como lo sole.[sic] E parea a questa annima che Dee e la Maire soa e tuti li angeli e santi tuti guardasem a questo homo cossì glorioso cum grande deleto. E parea che gi fosse dito in lo cor che era l'um de li sete candelé che dixe san Zoane in lo libero de l'Apocalis. E pensasse in lo cor so de queli doj scarim, chi aveam quela prea preciosa, che l'um era l'amor grande che ello avea a Dee, e l'atro de lo proximo. E vi anchor deré a quello sanito homo, e era um monego, lo quar era so devoto. E era in zenoium, cum le main zunte e um pocho levaj, como se ello orasse; e era presso a questi doj. E cossì era alegro lo glorioso biao Batesto in lo conspeto de Dee. Questa annima dixe, che ella se ne vegne; e romaxe (in) questa inmaginacium in la soa mente si forte, che l'era da loar. E gram tempo se n'alegrava de quela vixium, che quando ella se ne aregordava, gi parea cossì veirla, como l'avea vista da prima.

Finito libro.

Referamus gratia Xpo.