 |
Questa pagina a l'è stæta corretta. | |
cum lor, cognosceam in veritae che questa era overa de Dee, e benexianlo e laxavanlo star e far. Andava questo fantin semper benixando Dee de ben in meio. E semper se alongava da la gente pu l'un di cha l'atro, si che monto se ne dixea; e monti lo trovavam, e za quasi lo laxavam star, che ge parea che de questa cossa no se poise far atro. E maormenti che lo paere e la maere se ne stavam, e za no l'andavam pu cerchando, salvo raira vota.
Or vegne lo tempo che lo fantin avea za copío cinque agni, un di comensà andar pu in là che no era andao (che ello andà pu in là che no era andaeto), e intrà in un bosco chi era ben da la lunga d'abitatium da la gente. E pensome che ello fosse presso a lo deserto unde ello ze dapoa. E incontenente che questo fantin intrà dentro, ge vegne un odor de solitudem, e, como piaxè a Dee, pàrsegi esser in pareixo, unde ello se devesse repossar. E goardava li erbori de sovra freschissimi, e la terra de sota, chi parea un prao pin de fioi devisai. Elo comensà a loar Dee e mísseze a coger de quelle fioi chi ge pareivam pu belle; e como ello goardava pu in là, ello le veiva pu belle e pu nove. E tante n'aveiva za cogeite che elo no le poea tegney in scozo. E lantor se azà la roba tuto intorno, e se ne inpì tuto dentro e de fora, e tuta via loando Dee cum grande voxe. E queste fioy, si voreiva adur a lo paere e la maere. E quando ello ave ben pin lo scozo, e vi che era pasao hora de tronar a casa, vegniva cantando e si fito che ello parea un oxelo chy vorase cum alegreza grandissima de questo deserto che ello avea trovao, chi ge piaxea cotanto. La maere lo aspeitava vegando che era pasao l'ora de tronar. E stava in penser, e pregava Dee chi gi lo mandasse. E mandava fora la famigia: "Andae a vey da ogni via, se voi lo trovai, adúlo in brasso che ello serea forsa stancho". E ella stava a lo barchon a vey se ella l'odisse e visse da niguna parte. E in questo ella odì la voxe de lo fantin chy cantava lo Magnificat a ata voxe. E ella incontenente se inzenogià e rendè gratia a Dee. E acha* che lo fantin se ne ven su per le scare cum grande alegressa. E tuta la famigia se ne alegrava. E santa Helisabet gi ze incontra digando: "Fijor me, perchè ae-tu faeto cossì? E prechè é-tu staeto cossì tardi?" E incontenente lo fantin se inzenogià a ella digando: "Maere, perdonaime, che e o anchoi trovao le pu belle chosse; perzochè sum andao pu alla lunga che no sum uzao, e oge trovao le pu belle cosse e le pu belle fioy che may e visse. E vossivene adur, a messé e a voy, e persò sone staeto pu. E no me ne poea satiar, si g'è bello stallo". E la maere incontenente lo preixe e menàlo inter la camera de lo paere. E lo paere lo receivè dosementi. E lo fantin averse lo scosso chi era pin de fiori devisae introno intorno. E disse a lo paere e a la maere: "Queste fioi v'è aduto azochè voy ne vegay". E elli con devotium e lacre
