Segnor. E lo fantin, quando odì arecordar Iesu, paire* che ello se feyze incontra lo laite con alegreza. E la maire lo benixì. E incontenente se spantegà la nova inter li vexin e parenti e amixi. E fo si grande la alegreza, como may fosse in terra de la nativitae de un fijor. E no è atro santo de chy la ihexa faza festa de la soa nativitae.


Or vegne lo iorno che lo fantin so devea circuncider e metegi lo nome. E congregràse tuti li parenti e vexim e amixi, e cum grande festa se apareiavam de circuncider lo fantin. E demandàm la maire como ello deveiva avey nome. E ella disse: “Zoane è(l)lo so nome”. Questi se maraveiàm fortementi, e dissem: “Questo nome no è in lo to parentao”. E no vósegem mete questo nome. E andàm a Zacharia e demandàlo como ello devea avey nome. E demandà Zacharia lo charamà, e scrisse: “Zoane serà lo so nome”. E questi monto pu se maraveiàm, e incontenente tornà lo parlá a Zacharia, e incomenzà a parlá e benixì Dee de Israel e lo so Fijor incarnao, che ello savea che ello avea in cassa soa la Maire e(l)lo Fijor. E monto pu se deletava Zacharia de lo Fijor do Dee incarnao, cha de lo fijor chy era nao. E cantando inconmenzà quelo belissimo salmo: Benedictus Dominus Deus Israel, e seguì, e disse como lo Fijor de Dee era vegnuo per salvane. E poa se voze inver lo so fijor e disse: “E ti, fantin, é vegnuo profeta, per andar avanti [a] apareiar la soa via, e a confortar la gente chy se disponnam a reseive la nostra salvatium e pricaor de dotrina e de salvatium”. Questi, chi eram vegnui a la circuncixium de lo fantin Zoane, monto se maraveiàm. E odivam queste parole, ma no le intendeivam, ma dixeam inter elli: “Questo fantin chi e nao, serà quarche grande chosa”. Ma che diremo de la nostra Dona e de santa Helysabet, le quae eram in un loco e odivam tute queste parole e intendeivanle ben? È da crei, che elle aveam grandissima alegressa, e spetialmenti la nostra Dona, chi savea la veritae de tuto, e intendeiva le profetie perfetamenti. E questo bello cantá de Zacharia ella inpreixe incontenente a la prima vota. E incomensàlo a dilo a santa Helysabet. E forzachè ella gi lo mostrà puzóe vote, perchè ella era vegia, porea esser che ella no se tegnea cossì a mente, o perchè ella se deletava de odí parlá nostra Dona e (la nostra Dona) se infenzea alchuna vota, e (a)faxeasse mostrá a ella. E anchora lo Magnificat se fe mostrá. E in questo modo, e in monti atri che noy no savemo intende, se deletavam inseme de le cosse de Dee. E anchora se deletavam che era torná la parola a Zacharia, lo qua speze vote parlava cum elle de le cosse de Dee, le quay ello avea faete antigamenti in lo mondo. Ma monto pu se deletavam de le cosse nove che Dee avea faite per elli, zoè de la incarnatium de lo so Fijor, de che seguiva la salvatium de