 |
Questa pagina a no l'è stæta corretta. | |
Mi, per esempio, me son zà persûaso,
vagghe Orlando o Salandra a-o ministero...
– Gostin, Gostin; ti m'insavonn-i ö naso!
...o no se progrediä, de mezo zero.
Tanto pezo, allantôa, pe-a borghesia...
– Ammia, Gostin, che ti me taggi ö mento!...
...e pezo ancon de ciû pe-a Monarchia
se no se trêuva ûn ommo in Parlamento.
Intremmo in t'ûn momento decisivo,
e stemmo per andâ tûtti in malöa,
con questo movimento sovversivo
a và a finî... – Che ti me taggi a gôa!...
Ö CANTANTE SFIATÔU
– Signore, me dispiaxe 'sto momento
o sò gentile invito rifiûtâ...
L'âtrieri o me vegnûo ûn abbassamento
de vôxe che no pôeivo ciû parlâ.
Aveivo zà provôu «O Monumento»
da Gioconda. Di effetti da incantâ...
Ma, in to ciû bello, questo brûtto vento
o m'ha piggiôu in ta gôa... Che sciâ vêuan fâ?!...
