Pagina:Cava in to remoin 1930.pdf/134

No fasso pe vantäla, a mae Ginetta,
a me vêu ben, a dixe, da moî;
a me s'attacca cömme ûnn-a sanguetta
e a me costrinze sempre a dî de sci.

De votte a me fà ûn pö a ritrosetta,
a me gïa e spalle, a finze de dormî;
ma se prometto faghe i 'na robetta
a ridiventa dôçe da no dî.

Mi son feliçe e lë a l'é contenta,
godîmmo ö paradiso de l'amô;
a sêuxoa a nostra paxe a no tormenta

e i nostri painti se ne stan da lö.
Però 'na cosa söla a me spaventa:
i conti da moddista e dö sartô!

Ö BARBÊ POLITICANTE

A gente, se sà ben, a l'é ûn pö nëscia,^[1]
se lascia imbibinâ da-i parollôin...^[2]
– Famme a barba, Gostin; ho tanta sprescia!...
...che son de tïate, in fondo, de cordôin,

1. Nëscia: scema.
2. Imbibinâ: illudere.