 |
Questa pagina a no l'è stæta corretta. | |
52
Balbettando: - «O l[']é chi, sciä l'han sentïo?
»O l'é proprio o Loritto e o me conosce...»
Tûtte se spuncian pe sciortî d'asbrïo,
Che se rompe e carreghe e a porta a scrosce;
S'arrûbattan, se litigan, se dan
Pe vedde o Tögno cô Loritto in man.
53
Chì no parlo de cöse l[']é successo
In ti primmi momenti d'espanscion;
Tûtte o voeivan toccâ, veddio dappresso,
Tûtte dîghe ûnn-a miccia, ûnn-a raxon,
Mentre lê imbarlûgôu da l'invexendo,
O-e ammiava da stûpido, taxendo.
54
Finalmente calmâ l'effervescenza
Natûrale da primma commozion,
Fæta torna con tutte conoscensa,
Nêuvamente remisso in sciô baston,
O lascian solo a piggiâ fiato e lô
Van tûtte in coro a ringraziâ o Segnô.
