Pagina:Bacigalô.Prose.rimæ.1891.pdf/187


8
Quest'ukase o l'é parso troppo crûo,
E o l'ha dæto in scï nervi a ogni Sorella,
Perchè ognûnn-a, se sa, a l'aviæ vosciûo
Piggiâselo ûn pittin, portâlo in cella,
E demoâsene ûn pö comodamente,
Senza fâlo in presenza a tanta gente.

9
Ma no poendo variâ questo decretto,
Perchè a Maddre a l'ëa dûa, ferma, intestâ,
Lö se son contentæ de piggiâ o petto,
Sperzûandose che quando o l'arriviâ
De no fâ manco mostra che o ghe segge
In protesta di tal barbara legge.

10
Aveiva a Sûperiôa pe-o gran momento
Che Loritto o l'intrava in Monestê,
Tûtto disposto a che o riçevimento
O riûscisse adreitûa degno de lê;
E co-e ätre a l'ëa andæta in parlatöio
Pe portâlo con pompa in refettöio.

11
Lê frattanto o se fäva dexidëâ
Comme tûtte e personn-e de riguardo,
E-e Sorelle che o stavan aspëtâ
Mugugnavan zà ûn pö pe o so ritardo,
Quando sêunn-a a campann-a e in porterîa,
Se commensa a sentî da ciarlaxîa.