L'Evangeliu segundu Mattê/cap. III
←cap. II | L'Evangeliu segundu Mattê de cap. III |
cap. IV→ |
IN quellu tempu Giuvanni Battista u l’è vegnüu a predicâ ne u dezærtu da Giüddea
2 Dixendu: fæ penitensa, perchè u regnu du sê u s’è avvixinòu.
3 Perchè questu u l’æè quellu du quæ ha parlòu u prufeta Isaia quandu u l’ha ditu: a vuхe de quellu cu cria ne u dezærtu; preparæ a stradda du Segnû, e fæ driti i so sentê.
4 Ouа questu mæximu Giuvanni u l’aveiva ün vestî de pelle de camællu e ünha curezza de cheuiu ai fianchi, e u so nütrimentu ean grilli e amê sarvægu.
5 Allùa quelli de Gerüsalemme e de tütta a Giüddea e de tütte ê vixinanse du Giurdan andavan da lê, 6 E cunfessandu i so pecchæ ean da lê battezzæ ne u Giurdan.
7 Ma avendu vistu multi Farizei e Sadducei che vegnivan a u so battæximu u g’ha ditu: razza de vipere, chi v’ha insegnòu a schivâ a raggia che deve vegnî?
8 Fæ dunque früti degni de penitensa.
9 E nu stæ a dî in tu vostru cheu: nui emmu Abrammu per puæ; perchè ve diggu che Diu u peu fâ nasce da queste mæxime prie di figgieu a Abrammu.
10 Perchè u piccossu u le[sic] zà pôsòu â reixe di ærbui. Dunque qualunque ærbu che nu fa frütu bun u sâ taggiòu e cacciòu in tu feugu.
11 In quantu a mi ve battezzu cun ægua pe a penitensa; ma quellu cu[sic] vegnià doppu de mi u l’è ciü forte de mi, du quæ nu sun degnu de pоrtâ ê so scarpe: lê u ve battezzià cû Spiritu santu e cû feugu.
12 Lê u l’ha in ta so man a so paa e u nettezzià ben a so æa, e u radünià u so gran in tu granâ; ma u brüxià, ê pagge cun ün feugu cu nu se peu ammurtâ.
13 Allùa l’è arrivòu Gesü dâ Galilea a u Giurdan da Giuvanni per ese battezzòu da lê.
14 Ma Giuvanni u se ghe oppuneiva dixendu: mi ho bezeugnu d’ese battezzòu da ti e ti vegni da mi?
15 Ma Gesü u g’ha rispostu dixendu: òua lascime fâ; perchè cuscì ne cunven adempî tütta a giüstisia. Allùa u l’ha lasciòu fâ.
16 Quandu Gesü u l’è stætu battezzòu u l’è sciurtìu sübitu feua de l’øgua, e eccu se ghe sun aværti i sê, e u l’ha vistu u Spiritu de Diu cu discendeiva quaxi cumme ünha Columba e vegnî surva de lê.
17 E eccu ünha vuxe da u sê ch’a l ha ditu: questu u l’è u mæ Figgiu predilættu ne u quæ me sun cumpiaxüu.