In occasione del terzo anno secolare/Preghiera a Maria Santissima di Misericordia

In occasione del terzo anno secolare
dell'apparizione di N. S. di Misericordia in Savona
de Antogno Pescetto
Preghiera a Maria Santissima di Misericordia


[p. 28 modifica]
Preghiera a Maria Santissima di Misericordia

Catenella.


SONETTO I.


O terzo Çentanâ festoso ò trotta
Do santo giorno ò nostra câa Reginna
Quando ne-a Sacra Valle a noî vixinna
Seî comparsa in personna a ò Beato Botta;

Zà che a ò demonio allora hei dæto votta,
E Iddio fermoû de fâ de noî rovinna ,
A a Vostra Onnipotente Man Divinna
Da vitta abbandonemmo e buscioa e scotta;

E comme heî benedio træ votte ò Rian
Nostra amabile Moæe de teneressa,
Scampæne dò peccôu dal'oragan,

Tanto che a l'ora fosca da tristessa
Vegnimmo benedii de vostra man
Là donde seî l'etærna contentessa.


[p. 29 modifica]
SONETTO II.


Là donde sei l’etærna contentessa
Fragrante puro giglio e giassemin
Dò bællo Paradiso in to giardin,
Speranza nostra, amabile dolcessa,

Rapii daa Vostra affabile bellessa
Per quelli campi e spegi cristallin
Stan cantando festivi i Cherubin
Ogni Vostra beatifica Allegressa;

Cantan i atti d’amô caritativi
Onde abbondæ de grazie e de tesori
A noî atri che chì semmo ancon vivi,

E d’intanto marinne de ristori
Sempre in sen ne versæ graziosa a rivi,
A ò dôse canto di Celesti Cori.


[p. 30 modifica]
SONETTO III.


A ò dôse canto di Celesti Cori
Quello Sô che rò Çê tutto innamora
Non sa fâ grazia o Vergine Signora
Donde Voî n aggiæ parte e fæ i onori;

Per Voi trœuvan recoveri e ristori
Tutti comme han trovôu finna a quest’ora,
Perchè seî sola a graziosa Aurora
Che ò Çê spanteiga sempre a nœuvi fiori:

E comme Aurora bælla in mezo a e scioî
Onde ognunna sbottonna, e se smalocca
Spantegando per tutto nœuvi odòî,

Inni de grazie con festosa bocca
Fæ che cantemmo sempre intorno a Voî
Mistica Rœusa d’odorosa brocca.

[p. 31 modifica]
SONETTO IV. ED ULTIMO


Mistica Rœusa d’odorosa brocca
Che in Paradiso sorva tutte a spicca,
E fà tutta a Region fragrante e ricca,
Sciù Davidica tôre in âta rocca;

Quella onde tanta suavitæ ne fiocca
Anche fra noî, che donde a passa, e picca
I cœu pertusa ciù che i schœuggi a picca
E d’amô santo i feisce, i brûxa, i stocca;

De tante bestie velenose a ò lecco
Doppo salvæ che averà tutte in blocco
Queste di campi, e do terren ciù becco,

In mezo a ò zerbettin ciù værde e sciocco
Do Paradiso in to giardin mai secco
Staran fragranti in sempitærno a ò brocco.