Esopo Zeneize 1822/O Gallo, e o Diamante
| ←A Mosca, e o Bêu | Esopo Zeneize de O Gallo, e o Diamante |
O Cavallo, o Bêu, l'Agnello, e l'Aze→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Gallo, e o Diamante.
Un Galletto do Moinâ,
Un-na votta in to raspâ
O trovò in ta tæra ascoso
Un Diamante portentoso,
E ghe desse un-na beccâ,
Ma no poendolo colâ,
O capì, ch’o n’ea per lé,
O portò da-o Gioiellé,
E o ghe disse indifferente:
Questa pria così luxente
A sä bella, e de valsûa,
Ma per mi a l’è troppo dûa,
M’ea ciù cao trovâ do gran,
Un bacillo, o un pò de pan.
Un-na votta a un ignorante,
Soleniscimo pedante,
Un sò Barba, chi creppò,
Per legato o ghe lasciò
Un superbo, e rinommôu
Quadro in legno, e assæ stimôu
Do Pittô Raffaæ[1] d’Urbin,
O portò da-o Repessin,
E azenasso de natûa,
Gran nemigo da Pittûa,
Solo amante do dinâ,
O ghe o dé pe' un-na sasciâ,
E o ghe disse: pe' un quattrin
Vendiæ[2] ascì Raffaæ d'Urbin.
Pochi Galli do Moinâ
Se porrieiva anchêu trovâ,
Ma quanti Axi interessæ,
Solo amanti di dinæ!