Discorso in lengua zeneize doppo l'eleçion do Seeniscimo Duxe de Zena Antogno Çebà/Parte segonda
| ←Parte primma | Discorso in lengua zeneize doppo l'eleçion do Seeniscimo Duxe de Zena Antogno Çebà de Parte segonda |
Parte terça→ |
.jpg)
Queste belle c'ho dito treze gemme
Chi ornan ro zuffo, e ra collanna inseme
De Zena, son dro seme
Dra Ligustica gente si honorà
chi hàve tante vittorie in terra, e in Mà,
E chi fè zà tremà
Ro gran Cham, e ri Scithi in Tartaria,
Ro Siryffo, e ri Mori in Barbaria,
E spaventà in Soria
Co ri sò Mamaluchi ro Soldàn,
Ro Soffy in Persia, in Natolia Sulthàn,
E a Zena si menan
Prexoin belle migièra de Pisen,
E con Rè d'Aragon ri Cataren,
E assè Venecien,
E scorso c'hebben l'Austro, e ro Levante
Da ra Tanna scorrin fin'a l'Atlante.
E dre vittòrie tante
De quelli Heroi adesso n'è restaò
Dra Liguria, e de Corsega ro stao,
Ra libertè ch'è maò.
E però ben faremo a conservà
Quello che Dio n'hà deto a governà
In Terra, e in Mà;
Chi son questi doi Regni c'hamo in man,
Come no metto dubio, che faran,
Quelli Segnoi chi stan
A poppa, e si governan ro timon,
E a tutto daràn bonna provision,
E proveiran ancon
Per ogni caso de necessitè
Re militie havei pronte, e appareggiè
Dentro e fòra dra Cittè.
Re fortezze non solo guarderàn
Ma spesso ri pressidij cangieràn,
Chi dentro nyo ghe fan.
Custodiràn chiù quelle dri confin,
Che così ancora lò fan ri vexin
Notte, dy, seira, e matin.
Procureràn de stà ben avisè
Da chiù lòghi dro mondo, e chiù Cittè
Dre nòve sempre moè.
E quello chi se tratte, e se maneze,
Per no parei d'esse personne greze,
Ni havei de stao ra leze,
Che sareimo tegnùi per negligenti
E dro governo poco intelligenti
Se feissemo atramenti.
E facile audientia se darà
A qualonque persònna ra vorrà,
Ch'ogni Segnò ro fà.
Se farà teme ro Senato, e amà,
Ri Senatoi da Principi honorà,
Che cosi è ben de fà.
E ancon re savie grùe imiteràn,
Chi tennen un pè in ere, e un sasso in màn,
E così a l'erta stàn,
Ro pè staghe levaò, no per fuzì,
Ma esse vigilanti, e no dormì,
Ro sasso per ferì,
Come a ro tempo d'Achari s'usava,
Che con ro cazzafrusto se tirava,
E cosi David fava.
Ra formigora exemplo ancon sarà,
Chi ra sò provision per tempo fà,
E se ra mette in cà.
Così questi Segnoi procureràn,
Che a giusto prexo sè vin, òrio, e gràn,
E provision faràn
Inanzi tempo, come fan Lucheisi,
Chi ne recogien poco in lò paeisi,
E n'han per agni, e meisi.
E cosi ancon ri Sguizzari, e Grixoin,
Che no ne nascie dentr'i lò cantoin,
Si ne han re provisioin
Per doi agni, e per chiù da poei mangià,
E per y arteisi sò da lavorà,
E legne da bruxà,
Noi per gratia de Dè l'òrio, e ro vin
Ro recogemo dentro a ri confin,
Legne tra noi, e vexin,
Gran, quanto ne vogiemo a noi daràn
Lubech, Amburgh, Dancich, Ansterdan,
Ch'in un dì solo intràn
Ro nostro porto dre lò nave cento,
E in un meise n'intràn chiù de duxento,
E ne dè tà sustento
Ro gran tardio dro Settentrion,
Che a tutta quanta Italia o parse bon,
E si fò causa ancon,
Che tra noi no vegnissemo a re moen
E adenteure se deissemo da chen;
E se sà monto ben,
Che se in re terre non è de vituaria
Sola defeisa a ra fame contraria
Ra gente infuria, e svaria.
E a Napori poco è, i arme pigiàn,
E l'eletto Staràce si amazzan
In ro mancà dro pan,
Ben che ri rei dapò fon apichè,
E un'atra parte si ne fon squartè,
I atri in garia mandè;
Però a Zena stan ben re personne utile,
E ghe stà tanto pèzo re desutile;
Gente cattiva, e inutile
Spacchie in trei dì ra terra, e se ne vaghe,
E l'utile, e ra bonna si ghe staghe:
Ro cointo a ognun se traghe
Chi è bon a Zena, e chi nò l'è a san Remo,
Indrizzo lò; servixo noi haveremo;
E castigà faremo
Chi meriterà d'esse castigaò
Secondo ro delito perpetraò.
.jpg)