Dialogo fra o Taggiaborse e o sciô Novara
| ←torna a-i atre sciortie | Dialogo fra o Taggiaborse e o sciô Novara |
| [Zena, setembre 1823] (informaçion dezonta da "O mâ do Rosso cartâ"); exemprâ conservao presso a Libraja Naçionâ de França trancriçion dipromattica |
DIALOGO
FRA
O TAGGIABORSE
E O SCIÔ NOVARA.
Tag.
Son stanco de sta ciù in te quello fosso
Dove m'an misso o mille œttocento un
Cacciandome un mïon de morti addosso;
E là, comme se foiximo tutt'un,
M'han ficcaò a rifusa una mattin,
Piggiandome per l'aze do comun.
M'han fèto in ta perucca o burattin
Certi ratti che n'han de discrezion
Roziggiandome e corde do violin.
Mi son sa[t]òo de fæoa de strangoscion
Spinto un pochetto dà cuioxitè
Mi ascì de vedde certa procescion;
M'e stèto dito che per a Cittè
Ghe assè de l'invexendo, ch'e Foxinne
Han de sciorti con gran solennitè.
Nov.
Mi ascì me paiva de dormì in te spinne
E vedendo che lì ti te remesci
Me son misso a crià comme e galinne;
Emi resto stordìo de quelli nesci
Che se compiaxan de sta là accoeghè
Testa e gambe amuggé comme astramesci.
Aoa che ti me dixi a novité
De ste cazasse che han da fa bardoia
Me torna in mente i anni ch'en passè,
Fermemose un po chi, questa è Portoia
A l'e bello conosce a quella artà
Da nostra Santa chi e de Zena a groia:
De chi certo e Foxinne ha da passà,
Quest'anno han fèto cose a ciù non posso
Che no se peuan manco imaginâ
L'ôo solo che i frè portan addosso
O l'e tanto e caccioôò zu co a casseua
Che fà se ne porieva un gran colosso
Tag.
Novara, a procescion a l è za feua
Beneito sè che o tempo uo perdemmo,
Attenti ben, comme i gardetti à scœua.
I pastorali in primma ben squadremmo.
Che belli pessi d'ommi en proprio gente
Da fà scentà da mezo ogni malemmo!
Che tabarin, che cappa risplendente,
Che strascino de Côa, che maestè!
Ai tempi mè no l'aimo manco in mente.
Za l'òo co què son tutti recamè
A l'e cosa chi core a o dì d'ancheu
A no fa manco specie a questi frè.
Te lì o San Giacomin; bello figieu!
O và sodo, c'o pâ tutto in t'un tocco
E o fa un discorso chi t'abbrac,c,a o cæu.
Se t'eu vedde de l'ôo, amiaghe o stocco
A valdrappa, i speroin, staffe e bordon
Ciù bello assé de quello de San Rocco
Nov.
Mi veddo i pelegrin e sento o son
Chi n'arecovea, e o s'erze fin a stelle,
D'una sacra belliscima canson,
O recammo ch'i creuve come a pelle
O ghe tempesta e cappa e tabarin
Dove ghe brilla d'ôo croxette e arselle.
Chi gh'e o Confaon, c'o pâ proprio un spolin,
Beneito sè quello scio Paganelli
Chi l'a depento con di coì ben fin
Ghe ven appresso tutti i confratelli
Con a Cappa che d'ôo a pâ una lamma
E i tabarin violetti, oh comme en belli!
Santo Onorato a compagnia se ciamma,
Chi segue a croxe, che ben dì se peu
Ch'a luxe ciùe che a meza neutte a Sciamma,
Cremexi o tabarin, a cappa bleu
Con un recammo senza economìa
Che l'ôo ghe pâ versaò con o corzeu;
Tutti son stupefeti ognun i amìa
Perché an l'impronto d'ôo puro e sccetto,
E ai fraveghi han vuôo a Secrestìa
Questa chi ven appresso, ghe scometto
A me pâ a compagnia do Spirto Santo
Ansi a o l'e, che a conoscio da gardet[t]o
A croxe a l'e guarnìa e a pâ un'incanto
E cappe féte de grasé d'Argento,
Tabarin neigro, chi me piaxe tanto.
Di anime a compagnia ven a o momento,
E con scì bella croxe a comparisce
Che un'atra paegia ti a troviesci a stento.
De razo cou de doppia chi rapisce
Son e so cappe, e neigro o tabarin,
Ben inteiso chè d'óu ghe belle strisce.
Nostra Signora Assonta da vexin
Segue con croxe de trattuga antiga
Con gran canti d'Argento do ciù fin.
De razo gianco, ben rezente a sipiga,
Portan e cappe, e in bello cou de sexa,
I tabarin, mìa un po che bella liga!
Fra tutte quante son sciortìe d'in Gexa
Questa a le quella chi da ciù in te l'œggio
A chi fa distinzion da o vin â fexa.
Nov.
Aoua poi ciu' intrigâ no me ne veuggio
Gh'e o Cristo, mi vorrieivo dîne assè
Ma temo d'incontrâ quarche gran scœuggio.
N'a za parlaò ne i anni ch'en passé
O béle secche mè compâ Reginna
Ch'o me dava da intende d'ese frè;
Se ne porriè parlâ con a goa pinna
Pe un [secolo continuo in prosa] e in rimma
Ma què le a lode chi se gh'avvexinna.
Da o fondo da contrâ perfin in simma
Veddo nn bosco de torce asseize a sguasso
Ch'a l'e una cosa chi ghe dà gran stimma
Mia un po i bravi portoì, sodi de passo
Vestii con cappa cremexi, e i pomelli
Han tutti d'öu da l'âto fin a o basso.
Certo in testa ti n'è tanti cavelli
Per quante mutte han speizo questi frè
E no e porriè portâ dexe camelli.
Tag.
Aoa ven quella da Nativitè
Con a croxe de ricca guarnizion,
E i fradelli con tutti ben sparmè
De razo cremexin fèto a Lion
Han belle cappe, e neigri i tabarin
Son de velùo con l'öu a rubaton.
Chi ven a mè pascion, sento i violin
E tutta a turba di sunnoì ciù bravi
Con Decianne chi e un'atro Paganin.
Dime Novara ti te l'assunavi
Ancheu de vedde queste belle côse
Se co o me exempio ti no t'addesciavi?
Ecco che arriva a cascia, ognun s'arrôse
Questa a l'e cose degna d'ese vista
Fin da quelli che ghan sunnaò e pôse
Lezi un pò cose gh'e in te quella lista
San Giacomo o Maggiô mi cèo ghe lezo
Ma so che ti e un pittin curto de vista.
Nov.
Taggiaborse, levemose da mezo
Che in ta folla ne peuan montâ in sci calli
Semmo boscetti, andemosene a vezo
N'e ciù tempo de stâ in ti pé ai Cavalli.
FINE.