Donaver Antologia 1910/Lavate int'ro mê sangue, Amô, re moen
| ←torna a-a lista di atri scriti | Lavate int'ro mê sangue, Amô, re moen de |
| da F. Donaver, Antologia dialettale genovese, 1910 |
Lavate int'ro mê sangue, Amô, re moen:
Fammene à pê à cavallo, à ciù no posso:
Suçça, roziggia pù ra porpa e l'osso,
Co uña famme da lôi, raggia da chen.
Int'ro çuffo ra morte zà me ten,
Ni me spaventa ro sâtâ ro fosso,
Ro mâ l'è incancario, che ciù non posso
A Minetta lasciâ de vórei ben.
Un pò de mâ dra soçça, e ro malanno
Ghe vegne à chi te ciamma Amô benigno:
Mi te ciammerò sempre Amô tiranno.
Amô sença pietæ cruo e maligno,
Che à ro mê cianze quanto longo è l'anno,
Ti me rebatti sciù ro môrro un sghigno .